 |
| ໂດຍ: ຫຸມເພັດ ມະນີສຸກ |
ເຮືອຊ່ວງທີ່ງົດງາມທີ່ສຸດຂອງບຸນຊ່ວງເຮືອຫລວງພຣະບາງ ປີ 2015
-----------------------------------
ເຮືອຊ່ວງວັດໃຫມ່ ບ້ານປ່າຂາມ ສ້າງປະມານປີ 1987 ເປັນເຮືອຊ່ວງທີ່ມີຮູບຊົງ ຫລັກສະນະ ແລະສີສັນ ດອກດວງ ງົດງາມ ຕາມແບບສະບັບຂອງເມືອງຫລວງພຣະບາງໂດຍແທ້ ບຸນຊ່ວງເຮືອທີ່ລຳນ້ຳຄານເມື່ອວັນທີ່ 12 ກັນຍາ 2015 ຜ່ານມາ ເຮືອລຳນີ້ແມ່ນງົດງາມຫລາຍ ເພາະເປັນເຮືອທີ່ຍັງຮັກສາໂຄງສ້າງແບບເກົ່າໄວ້ໃຫ້ລູກຫລາຍໄດ້ເຫັນ ທັງ ສີພາຍ ກໍ່ມີການຫຍົ້ມຫົວເຮືອແທ້ ( ສ່ວນຫລາຍເຮືອຊ່ວງທີ່ເຂົ້າຮ່ວມກໍ່ມີແຕ່ຄົນຍອງຫົວເຮືອແລະຫມົ້ບເອົາຊື່ໆ ) ມີຄົນຄັດທ້າຍເຮືອແທ້ ແລະມີຄົນທັ້ງທ້າຍເຮືອແທ້ ຂ້າພະເຈົ້າຄິດວ່າອີກບໍ່ຈັກປີ ເຮືອແບບນີ້ກໍ່ຈະບໍ່ເຫລືອໄວ້ໃຫ້ເຫັນອີກແລ້ວ ເພາະການເວລາຈົນຕ້ອງປົດປະຈຳການ ເຫມືອນກັບເຮືອວັດແສນເມື່ອປີ 2014 ເປັນປີສຸດທ້າຍທີເອົາເຮືອວັດແສນ ທີ່ເປັນເຮືອແບບສະບັບຫລວງພຣະບາງອີກລຳຫນຶ່ງ ລົງນ້ຳ ແລະປີ 2015 ເພິ່ນກໍ່ບໍ່ສາມາດເອົາລົງນ້ຳໄດ້ອີກເພາະເຮືອເກົາຫລາຍແລ້ວ ຕາມທີ່ສັງເກດເຮືອຊ່ວງປີ 2015 ສ່ວນຫລາຍຈະເປັນເຮືອທີ່ຖືກດັດແປງໄປຈົນເກືອບຫມົດແລ້ວ.
ເປັນຫຍັງເຮືອຫລວງພຣະບາງໃນເມື່ອກ່ອນຈະຕ້ອງຈະຕ້ອງມີລັກສະນະແນວນີ້ ຂ້າພະເຈົ້າຄິດວ່າ : ຍ້ອນສະພາບແມ່ນ້ຳໃນເຂດຫລວງພຣະບາງມີແມ່ນ້ຳທີ່ເປັນນ້ຳແຮງ ມີແກ້ງຫລາຍ ດັ່ງນັ້ນເຮືອຊ່ວງຈະຕ້ອງຫນາ ທົນທານ ບໍ່ຄືເຮືອຊ່ວງປະຈຸບັນນີ້ທີ່ ອາໄສແຕ່ໄວ ເບົາ ແລະຊະນະຢ່າງດຽວ ແຕ່ຄວາມງົດງາມບໍ່ມີ ບໍ່ມີເອກລັກທັງດ້ານຮູບຊົງ ແລະສິລະປະເລຍ ແລະຈະຕ້ອງມີການປົວແປງເຮືອປະຈຳທຸກປີເມື່ອເອົາລົງຊ່ວງ ກົງກັນຂ້າມກັບເຮືອແບບເກົ່າທີ່ຍັງມີຄວາມງາມທີ່ເປັນເອກລັກ ທັງສີສັນ ຮູບຮ່າງ ທົນທານ ເສຍປຽບຢ່າງດຽວ ຄື ບໍ່ໄວ້ຄືເຮັດແບບໃຫມ່
ຂ້າພະເຈົ້າຢາກເຫັນທາງວັດທະນະທັມແຂວງຫລວງພຣະບາງເອົາໃຈໃສ່ເລືອງເຮືອຊ່ວງອີກຕື່ມແດ່ ຖ້າຈະອະນຸລັກ ກໍ່ຈະຕ້ອງເຮັດແບບຈິງໃຈ ໃນການອະນຸລັກ ຖ້າບໍ່ດັ່ງນັ້ນພວກເຮົາລູກຫລານກໍ່ຈະເຫັນແຕ່ຮູບເຮືອຊ່ວງແບບນີ້ໃນຮູບພາບເທົ່ານັ້ນ ຄົນຫລວງໃນສະໄຫມກ່ອນຖ້າເປັນເດັກນ້ອຍຊາຍ ແລະຊາຍຫນຸ່ມຈະພູມໃຈໃນບຸນຊ່ວງເຮືອເປັນພິເສດ ເປັນຕັ້ງແຕ່ ແຮມ 1 ຄ່ຳກໍ່ຈະເອົາເຮືອຊ່ວງລົງຫັດ ມີຄວາມສາມັກຄີກັນ ມີການພົບປະ ຮ່ວມກັນຈົນຮອດມື້ຊ່ວງ
ສ່ວນ ເດັກຍິງ ຍິງສາວ ກໍ່ຈະມັກບຸນປີໃຫມ່ລາວ ເພາະຈະໄດ້ໄປແຫ່ຫວໍ່ ແຫ່ນາງສັງຂານ ແລະໃສ່ບາດຢາດນ້ຳຕາມວັດວາອາຮາມຫລາຍໆແຫ່ງ
ໂດຍ: ຫຸມເພັດ ມະນີສຸກ
