ບັນທຶກການເດີນທາງ....... ສີສັນກາສີ(ຕອນ: ສຳຜັດຄວາມງາມ ອຸທິຍານຖໍ້າຂຸນລາງ)

ວັງວຽງເປັນເມືອງທ່ອງທ່ຽວທີ່ສັງຄົມທັງພາຍໃນ ແລະ ຕ່າງປະເທດຮູ້ຈັກມາຫລາຍປີ ແຕ່ເຊື່ອວ່າຫລາຍທ່ານອາດຍັງບໍ່ໄດ້ເດີນທາງໄປທ່ອງທ່ຽວຢູ່ເມືອງກາສີ ເຊິ່ງຫ່າງຈາກເມືອງວັງວຽງໄປປະມານ60ກິໂລແມັດ.
ກໍມີຫລາຍປັດໄຈທີ່ເຮັດໃຫ້ຫລາຍຄົນມອງຂ້າມເມືອງກາສີ ໂດຍສະເພາະຄົນລາວເຮົາ ເນື່ອງຈາກ ປັດໄຈການໂຄສະນາ ແລະ ຜະລິດຕະພັນທ່ອງທ່ຽວທີ່ຍັງບໍ່ຫຼາກຫລາຍເມື່ອທຽບໃສ່ເມືອງທ່ອງທ່ຽວອື່ນໆ. ແຕ່ເນື່ອງຈາກມີໄລຍະທາງທີ່ບໍ່ໄກຈາກວັງວຽງ ກໍຫນ້າຈະເຮັດໃຫ້ກາສີ ມີຄວາມໄດ້ປຽບຂຶ້ນມາ ເຊິ່ງ ສາມາດພັດທະນາເປັນປາຍທາງການທ່ອງທ່ຽວຈາກວັງວຽງສູ່ກາສີໄດ້ເຊັ່ນກັນ.

ຕາມເສັ້ນທາງກ່ອນເຖິງຖໍ້າຂຸນລາງ ຈະມີນໍ້າຕົກນ້ອຍໃຫຍ່ຫຼາຍໆຈຸດ

ຕົ້ນເດືອນມິຖຸນາ 2013 ຜູ້ຂຽນ ແລະ ທີມງານຈາກກຸ່ມຖ່າຍຮູບວຽງຈັນ ແລະ ວາລະສານຮູບ ໄດ້ມີໂອ ກາດເດີນທາງໄປເມືອງກາສີໃນຊ່ວງເວລາສັ້ນໆ 3 ມື້ 2 ຄືນ ເຊິ່ງກໍພົບເຫັນຫລາຍສິ່ງທີ່ຫນ້າປະທັບໃຈ ແລະ ຈະກາຍມາເປັນທ່າແຮງດ້ານການທ່ອງທ່ຽວໃນອະນາຄົດ.

ຄວາມຈິງແລ້ວກາສີມີຖໍ້າຫລາຍແຫ່ງທີ່ງົດງາມ ແຕ່ຍັງຂາດການພັດທະນາ, ການເຂົ້າເຖິງມີຄວາມຫຍຸ້ງຍາກເລັກນ້ອຍ ຈິ່ງອາດເປັນປັດໄຈທີ່ເຮັດໃຫ້ຊາວລາວມອງຂ້າມນອກຈາກຊາວຕ່າງປະເທດ .
ແຕ່ພາຍຫລັງທີ່ເສັ້ນທາງກາສີຫາເມືອງນ່ານປູຢາງສໍາເລັດ ການເດີນທາງໄປຖໍ້າຂຸນລາງກໍສະດວກສະບາຍ ຈາກທາງໃຫຍ່ເຂົ້າໄປພຽງ2ກິໂລແມັດ(ການເດີນທາງໄປໄດ້ສະດວກ).

ເສັ້ນທາງສູ່ຖໍ້າຂຸນລາງ

ອຸທິຍານຖໍ້າຂຸນລາງ ເປັນສະຖານທີ່ທ່ອງທ່ຽວທາງທໍາມະຊາດ ທີ່ງົດງາມ ແລະ ຫລາກຫລາຍ ທັງປ່າໄມ້ທີ່ຂຽວກະຈີ່, ສາຍນໍ້າຕົກອັນສວຍງາມຊຸ່ມເຢັນ ກ່ອນທີ່ຈະຍ່າງກ້າວເຂົ້າໃນຖໍ້າທີ່ມີຕໍານານກ່າວ ຂານ ແລະ ເລົ່າສູ່ກັນຟັງເຖິງນິທານຮັກອໍາມະຕະ ທ້າວຂຸນລູນາງອົ້ວ.

ຖໍ້າຂຸນລາງຕັ້ງຢູ່ຫ່າງຈາກຕົວເມືອງກາສີໄປຕາມເສັ້ນທາງກາສີເມືອງນານປະມານ20ກິໂລແມັດ ກໍຈະເຖິງບ້ານຫ້ວຍສ້ານ ແລະ ຢູ່ທາງຊ້າຍມືຈະມີປ້າຍຊີ້ບອກທາງໄປຖໍ້າຂຸນລາງ ເຊິ່ງຈະຂີ່ລົດໄປອີກປະມານ2ກິໂລແມັດ ເຊິ່ງເປັນທາງດິນ-ຫີນ ແຕ່ກໍໄປໄດ້ສະດວກ.

ເມື່ອໄປເຖິງອຸທິຍານຖໍ້າຂຸນລາງສິ່ງທໍາອິດທີ່ສໍາພັດໄດ້ກໍຄືຄວາມຊຸ່ມເຢັນ ຂອງພູຜາປ່າໄມ້ທີ່ປົກຄຸມ ສະຖານທີ່ແຫ່ງນີ້.

ຕາມເສັ້ນທາງຈະປົກຄຸ້ມໄປດ້ວຍປ່າໄມ້ດົກຫນາ

ອຸທິຍານຖໍ້າຂຸນລາງ ມີເນື້ອທີ່ 1.080 ເຮັກຕາ ປະກອບດ້ວຍບັນດາພູຫີນປູນທີ່ປົກຄຸມໄປດ້ວຍຕົ້ນໄມ້ໃບຫຍ້າ ແລະ ໃບກົກກ້ວຍ ອັນດົກໜາ ເຊິ່ງໄດ້ຊ່ວຍປົກປັກຮັກສາແຫລ່ງນ້ຳຄື: ຫ້ວຍສ້ານ, ຫ້ວຍສະໃພ້ ແລະ ບັນດາສາຂາຂອງມັນ. ຖືເປັນສະຖານທີ່ທ່ອງທ່ຽວທາງທໍາມະຊາດ ທີ່ສວຍງາມ ແລະ ຄົບບັນຍາກາດທີ່ຫາເບິ່ງໃນທີ່ແຫ່ງອື່ນໆໄດ້ຍາກ ເພາະໃນສະຖານທີ່ແຫ່ງນີ້ນອກຈາກມີຖໍ້າຫີນຍ້ອຍດ້ວຍລວດລາຍຕ່າງໆຂອງເລື່ອງລາວທ້າວຂຸນລາງໃນນິທານພື້ນເມືອງລາວເລື່ອງ “ຂຸນລູນາງອົ້ວ” ອັນມີຊື່ສຽງ ແລ້ວ ຍັງມີນໍ້າຕົກຕາດນ້ອຍໃຫຍ່ຢັງຢາຍຕະຫລອດສາຍທາງການໄປເຖິງປາກຖໍ້າ. ນອກນັ້ນ ຍັງອຸດົມສົມ ບູນດ້ວຍຊີວະນາໆພັນທີ່ຂຽວກະຈີຊຸມເຢັນຕະຫລອດປີ.

ວິຖິຊີວິດຊາວບ້ານຫ້ວຍສ້ານ

ສາຍນ້ຳເຫລົ່ານີ້ໄຫລຜ່ານຫລືບຫີນຕ່າງໆທີ່ສູງຊັນເຮັດໃຫ້ເກີດມີນ້ຳຕົກຕາດຫລາຍແຫ່ງ, ຢູ່ທາງເບື້ອງຂວາຂອງທາງຂຶ້ນຖ້ຳມີຫ້ວຍ (ຫ້ວຍສະໃພ້), ມີນ້ຳຕົກຕາດສອງແຫ່ງຮຽກວ່ານ້ຳຕົກຕາດຫ້ວຍສະໃພ້ 1 ແລະ 2. ນ້ຳຕົກຕາດທີ່ສູງປະມານ 10 ແມັດໄຫລທອດລົງເປັນຊັ້ນໆຕາມຮ່ອມຜາຊັນ.

ປາກຖ້ຳຂຸນລາງຢູ່ທາງທິດຕາເວັນຕົກ ມີຂັ້ນໄດຂຶ້ນປະມານ 400 ຂັ້ນຈິ່ງຮອດປາກຖໍ້າ ແລະ ມີຂັ້ນໄດລົງອີກດ້ານໜຶ່ງປະມານ 130 ຂັ້ນເພື່ອໄປຫານ້ຳຕົກຕາດ. ພາຍໃນຖໍ້າກວ້າງຂວາງ ແລະ ແຍກອອກເປັນຫລາຍຜົ້ງ ຫລາຍໂພງ ຫລາຍຫ້ອງ ຫລາຍຊັ້ນ ກວ້າງ-ແຄບເຖິງສີ່ລະດັບ ມີທາງຍ່າງລວງດຽວທີ່ຍາວໄປທາງທິດຕາເວັນອອກປະມານ 250 ແມັດ ມີເງື່ອນໄຂສະດວກໃນການທ່ຽວຊົມ.

ດ້ານໃນຂອງຖໍ້າຂຸນລາງ ແຕ່ຕອນທີ່ໄປນັ້ນຈັກປັ່ນໄຟເພ ເຮັດໃຫ້ການຖ່າຍຮູບພົບຄວາມຫຍຸ້ງຍາກ ແລະ ບໍສາມາດເຂົ້າເລີກ

ຊາວບ້ານໄດ້ພາກັນອະທິບາຍຄວາມໝາຍຂອງບາງຮູບທີ່ຢັ້ງຢືນໃຫ້ເຫັນວ່າ ຖ້ຳນີ້ແມ່ນບ່ອນຢູ່ອາໄສຂອງທ້າວຂຸນລາງຕົວລະຄອນໃນນິທານເລື່ອງ “ທ້າວຂຸນລູ-ນາງອົ້ວ” ນິທານຮັກອຳມະຕະອັນສຸດຊຶ້ງແຕ່ບໍ່ມີໃຜສົມຫວັງ ແລະ ຈົບລົງດ້ວຍຄວາມໂສກເສົ້າສະຫຼົດໃຈ.

ຂຸນລາງໄດ້ຕົບແຕ່ງສະຖານທີ່ແຫ່ງນີ້ເພື່ອໃຊ້ເປັນເຮືອນຫໍໃນພິທີແຕ່ງດອງ ແລະ ຈະຄອງຄູ່ກັບນາງອົ້ວຄ່ຽມສາວງາມແຫ່ງເມືອງນະຄອນກາຍ. ພາຍໃນຖ້ຳມີໝາກເບັງໃຫຍ່ (ສຳລັບພິທີສູ່ຂວັນ), ຫ້ອງຫໍຕະຫລອດທັງທົ່ງນາ ແລະ ກອງເຂົ້າໃຫຍ່. ທັງໝົດເຫຼົ່ານັ້ນແມ່ນຫຼັກຖານສ່ວນໃດສ່ວນໜຶ່ງທີ່ໄດ້ກາຍເປັນຫີນ ແລະ ຫຼົງເຫຼືອໄວ້ເປັນອານຸສອນ ດັ່ງນັ້ນຖ້ຳນີ້ຈຶ່ງໄດ້ຮຽກຊື່ວ່າ: ຖ້ຳຂຸນລາງ.

ຂ້າພະເຈົ້າ ແລະ ທີມງານອີກ4ຄົນໃຊ້ເວລາຖ່າຍຮູບປະມານ2ຊົ່ວໂມງ ເພາະວາງແຜນວ່າພາກບ່າຍຈະຂີ່ລົດຈັກ ພະຈົນໄພຕາມສາຍທາງເລກທີ13ເຫນືອຍ່ານກາສີ-ພູຄູນ ຈິ່ງເຮັດໃຫ້ໄດ້ຮູບຢູ່ອຸທິຍານບໍ່ຫລາຍປານໃດ ປະກອບກັບໃນມື້ນັ້ນຫມໍ້ປັ່ນໄຟຢູ່ໃນຖໍ້າເພ ເຮັດໃຫ້ການຖ່າຍຮູບໃນຖໍ້າພົບຄວາມຫຍຸ້ງຍາກພໍສົມຄວນ.ແຕ່ເຖິງຈະໃຊ້ເວລາບໍ່ດົນ ກໍສາມາດສໍາພັດໄດ້ເຖິງຄວາມຊຸມເຢັນສວຍງາມ ເຊິ່ງໂອກາດ ຫນ້າຈະເດີນທາງມາອີກຄັ້ງແນ່ນອນ.

ດ້ານໃນຂອງຖໍ້າຂຸນລາງ ແຕ່ຕອນທີ່ໄປນັ້ນຈັກປັ່ນໄຟເພ ເຮັດໃຫ້ການຖ່າຍຮູບພົບຄວາມຫຍຸ້ງຍາກ ແລະ ບໍສາມາດເຂົ້າເລີກ

ສ່ວນການເຂົ້າໄປໃນຖໍ້າຂຸນລາງນັ້ນດີແທ້ ກໍຄວນໄປແຈ້ງບ້ານ ຫລືພະນັກງານນໍາທ່ຽວຂອງ ບ້ານ , ການໄປການມາກໍຄວນລະມັດລະວັງ ແລະ ຄວນປະຕິບັດຕາມການແນະນໍາຂອງພະນັກງານນໍາ ທ່ຽວ. ທີ່ສໍາຄັນຄວນຖືໄຟສາຍໃຫຍ່ໆໄປພ້ອມ ເພາະຈະເຮັດໃຫ້ທ່ານເຫັນຄວາມງົດງາມຂອງຖໍ້າໄດ້ດີ ຍິ່ງຂຶ້ນ.
ເອົາເປັນວ່າ ຫາກທ່ານໃດມີເວລາ ກໍຢ່າລືມໄປຢ້ຽມຢາມເມືອງກາສີ ໂດຍສະເພາະຕາມສາຍທາງກາສີ ຫາເມືອງນານ ເພາະນອກຈາກຖໍ້າຂຸນລາງອັນງົດງາມແລ້ວ, ຫ່າງຈາກນີ້ບໍ່ໄກ ກໍຈະມີທິວທັດອັນສວຍງາມທີ່ຫນ້າຕື່ນຕາຕື່ນໃຈເມື່ອມາເຫັນ ເຊິ່ງເຊື່ອວ່າທ່ານຈະປະທັບໃຈບໍ່ລື່ມ.

ທຳມະຊາດອະທິີບານຖໍ້າຂຸນລາງ ເມືອງກາສີ ແຂວງວຽງຈັນ

ສ່ວນມື້ຕໍ່ໄປຈະນໍາພາທ່ານ ໄປຊົມທໍາມະຊາດຕາມສາຍທາງກາສີຫາພູຄູນ ເຊິ່ງເປັນປະ ສົບການໃຫມ່ທີ່ມ່ວນທ້າທາຍສໍາລັບການເດີນທາງທ່ອງທ່ຽວ.

---------------------
ບົດລະຮູບໂດຍ:  Noy Saylakham
ຫລືຕິດຕາມຜົນງານຕື່ມໄດ້ທີ່ Facebook/ Saylakham images



---------------------
ປະເທດລາວ: ຄວາມງາມທີ່ສຳພັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com