ໜອງສະພັງເລນ
ໜອງສະພັງເລນ
ຕັ້ງຢູ່ບ້ານໜອງບອນ ເມືອງໄຊເຊດຖາ ນະຄອນຫລວງວຽງຈັນ ( ບໍລິເວນລານເດິ່ນພຣະທາຕຸຫລວງ
ເມືອ 20 ກວ່າປີ ເພິ່ນເອີ້ນວ່າ ສວນເຍົາວະຊົນທັນວາ ) ສະເພັງເລນ ກ່ຽວກັບບັນດາໜອງສະພັງຕ່າງໆ
ທີ່ມີຊື່ຂຶ້ນຕົ້ນວ່າ ເຊັ່ນ : ສະພັງໜໍ້ , ສະພັງເມີກ ປະຈຸບັນນີ້ເຫລືອແຕ່ 3 ສະພັງ
ສະໄຫມກ່ອນນັ້ນມີຫລາຍໆ ເຊັ່ນ : ສະພັງມ່ວງ ( ຜູ້ເຖົ້າເພິ່ນວ່າຢູ່ແຖວໂຮງແຮມຣາຊວົງ )
ບັນດາສະພັງ ຫລືໜອງເຫລົ່ານີ້ ກ່ຽວພັນກັບເລື່ອງຂອງພຣະຍານາກ ທັງເປັນບ່ອນເຂັດຍຳທັງນັ້ນ
ແລະໃນອະດິດເກົ່າກ່ອນ ບັນດາຂ້າຣາຊການ ຫລືເຈົ້ານາຍຂັ້ນແລະຊັ້ນຕ່າງໆ ກ່ອນຈະເຂົ້າຮັບຕຳແຫນ່ງຕ່າງ
ເພິ່ນກໍ່ຈະນຳເອົານ້ຳຈາກ 3 ສະພັງ ( ສະພັງເລນ, ສະພັງໝໍ້, ສະພັງເມີກ ) ແລະນ້ຳຈາກ 9 ວັດ ທີ່ສຳຄັນໃນເມືອງວຽງຈັນທນ໌ ເຊັ່ນ : ວັດອົງຕື້, ອິນແປງ, ມີໄຊ, ວັດຈັນ, ຫາຍໂສກ, ຊຽງຍີນ, ສຼີສະເກດ, ເກົ້າຍອດ, ເພຽວັດ ເປັນຕົ້ນ ເພື່ອນຳເອົາໄປເຮັດນ້ຳ ພິພັດສັດຈະຍາບັນ ( ນ້ຳສາບານ ) ພິທີດັ່ງກ່າວ
ແມ່ນຈັດຂຶ້ນທີ່ ວັດອົງຕື້ ມະຫາວິຫາຣ ເພື່ອໃຫ້ບັນດາເຈົ້ານາຍ ແລະຣາຊການຕ່າງໆ ທີ່ຈະຮັບຕ່ຳແຫນ່ງທັງຫລາຍ
ດື່ມນ້ຳນີ້ຮ່ວມກັນ ນ້ຳຕ່າງໆນີ້ກໍ່ຈະມີດາບ ມີຫ້ອກ ມີງ້າວ ຈຸ່ມລົງນ້ຳ
ເພື່ອເປັນການສາບແຊ່ງ ຖ້າເຮັດບໍ່ດີກັບຊາດ ບ້ານເມືອງ ຫລືກັບປະຊາຊົນ ຖ້າເຮັດດີ
ຊື່ສັດຕໍ່ປະເທດຊາດ ບ້ານເມືອງ ກໍ່ຂໍໃຫ້ຈະເຣິນຮຸ່ງເຮືອງໄປຫນ້າ ...
ບັດນີ້ມາເວົ້າເຖິງໜອງສະພັງເລນ
ກັນເລີຍ ຕຳນານໜອງສະພັງເລນ ແມ່ນອີງຕາມນິທານ ອຸຣັງຄະທາຕຸ ໄດ້ກ່າວເຖິງໄວ້ວ່າ :
ສະຖານທີ່ແຫ່ງນີ້ ເດີມນັ້ນແມ່ນໜອງນ້ຳ ເກີດຂຶ້ນຕາມທຳມະຊາດ ທີ່ໃສສະອາດແລະເຢັນເປັນພິເສດ
ຕັ້ງຢູ່ເທິງພູເຂົາລວງ ແລະເປັນສ່ວນຫນຶ່ງຂອງໜອງຄັນແທ້ເຊື້ອນ້ຳ
ເປັນບ່ອນອາໄສຢູ່ຂອງສັດນາໆພັນ ອຸດົມສົມບູນໄປດ້ວຍສັບພະສິ່ງທັງຫລາຍທັງປວງ ມີເລື່ອງທີ່ເລົ່າກັນມາດົນນານຢ່າງງຶດງໍ້
ກ່ຽວກັບສິ່ງລຶກລັບ ເຊິ່ງເປັນເສັ້ນທາງຂຶ້ນ-ລົງ ແລະເປັນບ່ອນອາໄສຂອງພຣະຍານາກ
ພວກກາຍທິບ ຜີເຊື້ອນ້ຳ ແລະສິ່ງທີແປກປະຫລາດ ອາໄສຢູ່ ມີກົກໄມ້ປ່າແປ້ງ ກົກໃຫຍ່
ກົກຫນຶ່ງເກີດຢູ່ຂ້າງຫນອງ ແຕກໃບປົກຄຸມກັ້ງບັງຝົນໄດ້ ຄົນບູຮານມັກມາບູຊາພຣະຍານາກ
ຢູ່ບ່ອນນີ້ເປັນປະຈຳທຸກໆປີ .
ໃນສະໄຫມຂອງພຣະຍາຈັນທະບູຣີປະສິດທິສັກ
ໄດ້ມີພຣະອໍຣະຫັນ 2 ອົງ ທີ່ມີຊື່ວ່າ : ພຣະມະຫາພຸດທະວົງສາ ແລະພຣະມະຫາສັດສະດີ
ກໍ່ໄດ້ມາປະຕິບັດທັມ ສູດຂັນທະປະຣິດຕະຄາຖາ
ແຜ່ເມດຕາຈິດໃຫ້ກັບສັບພະສັດທັງຫລາຍທີ່ຢູ່ທີ່ໜອງຄັນແທ້ເຊື້ອນ້ຳແຫ່ງນີ້ເປັນປະຈຳ ,
ພຣະພຸດທະຣັດຂິດ ໜຶ່ງໃນພຣະສະມະນະທູດ ໄດ້ເດິນທາງມາຈາກຊົມພູທະວີບ (ອີນເດຍ)
ເພື່ອມາເຜີຍແຜ່ພຣະພຸດທະສາສະໜາ ໃນດິນແດນແຫ່ງນີ້ ກໍ່ໄດ້ມາພັກເຊົາ
ຈຳພັນສາຢູ່ແຄມຫນອງນ້ຳໃກ້ພູເຂົາລວງ ກໍ່ຄືບໍລິເວນໜອງນ້ຳແຫ່ງນີ້.
ບັນດາພຣະອໍຣະຫັນເຈົ້າ ທັງ 5 ພຣະອົງ ທີ່ກັບຈາກການໄປສຶກສາທີ່ຊົມພູທະວີບ (ສະໄຫມພຣະເຈົ້າອະໂສກ ມະຫາຣາຊ) ກໍ່ໄດ້ນຳເອົາພຣະບໍຣົມມະສາຣິຣິກະທາຕຸ ( ກະດູກຫົວເນົ່າ ) ຂອງອົງສົມເດັດພຣະສັມມາສັມພຸດທະເຈົ້າ ມາຈາກເມືອງຣາຊະຄຶ ດິນແດນຊົມພູທະວິບ ເພື່ອມາກໍ່ອູບມຸງປະດິດສະຖານໄວ້ທີ່ພູເຂົາລວງ ກໍ່ໄດ້ມາພັກອາໄສຢູ່ໜອງນ້ຳແຫ່ງນີ້ ໃນຄັ້ງສ້າງພຣະເຈດີໂລກະຈຸລາມະນີ ( ສ້າງພຣະທາຕຸຫລວງ ກໍ່ກວາມອູບມຸງເກົ່າ ) ກໍ່ໄດ້ມາຂຸດເອົາດິນໃນບໍລິເວນຫນອງນ້ຳແຫ່ງນີ້ ເພື່ອເອົາໄປປັ້ນເປັນດິນຈີ່ ນຳໄປກໍ່ເປັນພຣະທາຕຸຫລວງ
ດັ່ງນັ້ນຊາວເມືອງວຽງຈັນທນ໌ ຈຶ່ງພາກັນປ່ຽນຊື່ ຈາກໜອງຄັນແທ້ເຊື້ອນ້ຳ ມາເປັນໜອງສະພັງເລນ ຕາມຄວາມເຊື່ອກັນວ່າ ມີຄວາມສັກສິດ ເຊິ່ງຖືວ່າເປັນໜອງນ້ຳຊັ້ນສູງ ແລະບາງໄລຍະ ກໍ່ມີໂຄງການທີ່ຈະຖົມສະພັງ ຫລືແປສະພາບເປັນຢ່າງອື່ນ ກໍ່ຜູ້ທີ່ຈະເຮັດ ແລະຜູ້ອອກຄຳສັ່ງກໍ່ຈະມີອັນເປັນໄປທັງນັ້ນ.
ມາຮອດປະຈຸບັນນິ້ ໜອງສະພັງເລນໄດ້ມີການປັບປຸງຂຶ້ນໃຫມ່ ໃນປີ 2016 ນີ້ເອງ ໂດຍ : ທ່ານຄຳພັນ ມາລາບັນດິດແລະນາງບົວວຽງ ເພັດທະລາຄຳ ພ້ອມດ້ວຍລູກຫລານແລະຍາດຕິພິ່ນ້ອງທັງຫລາຍ. ໂດຍໄດ້ປັ້ນຮູບພຣະຍານາກ 7 ສ້ຽນ ເພື່ອຮັກສາຮ່ອງຮອຍທາງປະຫວັດສາດຂອງຊາດລາວໄວ້ໃຫ້ລູກຫລານລາວແລະຜູ້ສົນໃຈໄວ້ສຶກສາຄົ້ນຄວ້າ ແລະຜູ້ສົນໃຈໄດ້ຄວາມເປັນມາຂອງປະຫວັດສາດທີ່ຕິດພັນກັບພຸດທະສາສະໜາ ບູຮານສະຖານແຫ່ງສຳຄັນຂອງຊາດລາວເຮົາ ນີ້ສຶບໄປຊົ່ວການລະນານນັ້ນແລ.
