ການເດີນທາງທີ່ຕືນເຕັ້ນທີ່ສຸດ...ຍ່າງປ່າ-ປີນຜາ ສໍາຜັດທໍາມະຊາດ ຄວາມງາມຕາດຂະເມິດ ແລະ ຫົວເສືອ

(ຕໍ່ຈາກຫົວຂໍ້ກ່ອນ)ຫລັງຈາກຊົມວິວທັດອ້ອມຮອບດ່ານຫນອງຫລວງແລ້ວ ຂ້າພະເຈົ້າ ແລະ ຫຼານຊາຍກໍມຸ່ງຫນ້າສູ່ ນໍ້າຕົກທີ່ຢູ່ດ້ານລຸ່ມຂອງດ່ານ ແລ້ວຄ່ອຍໆຍ່າງຈາກນໍ້າຕົກດ້ານເທິງ ລົງໄປເລື້ອຍໆຕາມເສັ້ນທາງນ້ອຍໆ ລຽບສາຍນໍ້າ ເຊິ່ງມີບັນດານໍ້າຕົກນ້ອຍໃຫຍ່ນັບສິບໆຕາດຢັງຢາງລົງໄປເປັນລັນໆຢ່າງສວຍງາມ. 

ໃນແຕ່ລະນໍ້າຕົກຕາດກໍແວ່ຖ່າຍຮູບບັນທຶກຄວາມປະທັບໃຈໄວ້ຫນ້ອຍຫນຶ່ງ.  ພວກເຮົາຍ່າງໄປນໍາ ຖ່າຍ ຮູບໄປພ້ອມປະມານ2ຊົ່ວໂມງ ກໍມາເຖິງຜາເຫວອັນສູງຊັນ ແລະ ແນມເຫັນສາລາທີ່ບໍລິສັດກຣີນ ດິດສະໂຄເວີຣີ (Green discovery) ສ້າງໄວ້ຢູ່ເບື້ອງລຸ່ມ ຈິ່ງຈື່ໄດ້ວ່ານັ້ນຄືເປົ້າຫມາຍ ການເດີນທາງສູ່ຄວາມຝັນທີ່ທ້າທາຍໃນຄັ້ງນີ້.

ຫລັງຈາກນັ້ນກໍຊອກຫາ ເສັ້ນທາງລົງສູ່ສາລາຊົມນໍ້າຕົກ. ປາໂທ… ຂ້າພະເຈົ້າອຸທານ ອອກມາ ເມື່ອເຫັນເສັ້ນທາງທີ່ຕ້ອງປິນໄຕ່ຫນ້າຜາ(ໃຄແດ່ທີ່ບໍລິສັດກຣີນ ດິດສະໂຄເວີຣີ ຕອກເຫຼັກໃສ່ຫີນໄວ້ຢ່າງແຫນ້ນຫນາ ເຮັດໃຫ້ອຸ່ນໃຈໃດວ່າລົງໄປໄດ້ຢູ່).

 ຂ້າພະເຈົ້າຄິດທົບທວນດົນເຕີບວ່າຈະລົງໄປ ຫລື ບໍ່ເພາະກໍບໍ່ຮູ້ວ່າຈາກຈຸດນີ້ຕ້ອງຜ່ານຄວາມທ້າທາຍຫຍຸ້ງ ຍາກອີກຈັກຈຸດກວ່າຈະຮອດເປົ້າໝາຍ.  ແຕ່ດ້ວຍຄວາມທີ່ຕົນກໍເປັນຄົນທີ່ຢູ່ບ້ານປາຂາດອນມາເລື່ອງຊໍານີ້ ຄົງບໍ່ມີຫຍັງຫນ້າເປັນຫ່ວງ ຈິ່ງຕັດສິນໃຈປິ່ນລົງສູ່ດ້ານລຸ່ມ ເພາະບໍ່ມີທາງອື່ນນອກຈາກການຂີ່ສະລິງລົງ (ຫລືມີທາງອື່ນຂ້າພະເຈົ້າກໍບໍ່ຮູ້).

ໃຊ້ເວລາປະມານ 30 ກວ່ານາທີ ກໍລົງມາເຖິງສາລາ. ຄວາມງົດງາມຂອງທໍາມະຊາດ ແລະ ສາຍ ນໍ້າຕົດຕາກຂະເມິດ ແລະ ຫົວເສືອ ທີ່ຢູ່ກ້ອງຜາເຫວອັນສູງນັບ100ແມັດ ກໍເຮັດໃຫ້ຂ້າພະເຈົ້າເຊົາອິດ ເມື່ອຍເມື່ອໄດ້ມາເຫັນ.

ຂ້າພະເຈົ້າບໍ່ລໍຊ້າຈັບ ກ້ອງອອກມາຖ່າຍຮູບຢ່າງເພີດເພີນມ່ວນຊື່ນປະມານ 1 ຊົ່ວໂມງ; ຈາກນັ້ນ ກໍມານັ່ງພັກຜ່ອນຊົມທິວທັດຄວາມງາມຂອງປ່າສະຫງວນດົງຫົວສາວ ອັນອຸດົມສົມບູນຢູ່ສາລາ. ຈາກນັ້ນກໍໄດ້ຮ່ວມ ພາເຂົ້າສາມັກຄີກັບຊາວບ້ານຫນອງຫລວງ ແລະ ພະນັກງານນໍາທ່ຽວຂອງບໍລິສັດ ກຣີນ ດິດສະໂຄເວີຣີ ທີ່ນໍາພາແຂກຕ່າງປະເທດຄະນະຫນຶ່ງມາທ່ຽວ.

 ຕາດຂະເມິດ ເປັນຕາດຂະຫນາດໃຫຍ່ທີ່ມີນໍ້າຕົກຈາກຫນ້າຜາອັນສູງຊັນກວ່າ 100ແມັດ ກາງປ່າສະຫງວນດົງຫົວສາວ ເຂດບ້ານຫນອງຫລວງ ເມືອງປາກຊ່ອງແຂວງຈໍາປາສັກ. ຢູ່ບໍລິເວນດຽວກັນ ຍັງມີ “ ນ້ຳຕົກຕາດຫົວເສືອ ” ເຊິ່ງເປັນສິ່ງໜຶ່ງທີ່ພິເສດສຳລັບຜູ້ທີ່ໄດ້ມາພົບເຫັນ ເພາະຈະໄດ້ເຫັນຄວາມງາມຂອງນ້ຳຕົກທັງສອງສາຍ ທີ່ຢູ່ບໍລິເວນດຽວກັນໄຫຼລົງມາບັນຈົບກັນ, ແວດລ້ອມດ້ວຍທໍາມະຊາດພູຜາປ່າໄມ້.

ການຍ່າງປ່າຊົມທໍາມະຊາດ ແລະສາຍນໍ້າຕົກ ເປັນກິດຈະກໍາທີ່ທ້າທາຍມ່ວນຊື່ນ ໂດຍສະເພາະເມື່ອມາເປັນຫມູ່ຄະນະ. ຫາກທ່ານມີເວລາ ແລະ ມີຜູ້ພາທາງທີ່ດີ ກໍສາມາດລົງໄປເຖິງນໍ້າຕົກຕາດທີ່ສວຍງາມ ແລະ ໃຫຍ່ທີ່ສຸດນັ້ນຄືຕາດຂະເມີດ ແລະ ຕາດຫົວເສືອ.

ແຕ່ການຍ່າງປ່າຊົມທໍາມະຊາດ ແລະ ນໍ້າຕົກອາດມີຄວາມຫຍຸ້ງຍາກສໍາລັບເດັກນ້ອຍ ແລະຄົນສູງອາຍຸທີ່ຈະໄປເຖິງຕາດຂະເມີດ ແລະ ຕາດຫົວເສືອ. ຢ່າງໃດກໍຕາມທ່ານກໍສາມາດຊົມຄວາມງາມຂອງຕາດເບື້ອງເທິງ ເຊິ່ງມີນໍ້າຕົກຫລາຍຊັ້ນ ເຊິ່ງການໄປເຖິງມີຄວາມສະດວກກວ່າ.

ຫາກທ່ານມັກຄວາມທ້າທາຍແບບສຸດຂີດ ກໍສາມາດຊື້ລາຍການທ່ອງທ່ຽວຂອງບໍລິສັດທ່ອງທ່ຽວກຣີນ ດິດສະໂຄເວີຣີ ທີ່ເປີດບໍລິການທ່ອງທ່ຽວພະຈົນໄພໃນຮູບແບບຂີ່ສະລິງ ເພື່ອລົງສູ່ດ້ານລຸ່ມສຸດຂອງນໍ້າຕົກຕາດ ແລະ ສໍາຜັດການນອນຄ້າງຄືນເທິງກົກໄມ້.

ການລົງມາວ່າຍາກ ແຕ່ການປິນກັບຂຶ້ນເມືອ ຖືວ່າຍາກວ່າຫຼາຍເທົ່າ;  ຂ້າພະເຈົ້າຖາມຊາວບ້ານວ່າ ມີທາງອື່ນໄປອິກບໍ່(ບໍ່ຢາກປີ່ນເມືອທາງເກົ່າ ຊາວບ້ານບອກວາມີຢູ່ແຕ່ບໍ່ຈື່ແລ້ວ).
ເອົາລະເມື່ອບໍ່ມີທາງເລືອກ....ຂ້າພະເຈົ້າ ສູບລົມເຂົ້າປອດບາດເລິກໆ ແລ້ວກໍຕັດສິນໃຈປິນກັບທາງເກົ່າ.

ການເດີນທາງມາສູ່ຕາດຂະເມີດໃນປ່າສະຫງວນດົງຫົວສາວ ຖືເປັນກິດຈະກຳການທ່ອງທ່ຽວທີ່ດີເລີດທີ່ສຸດເທົ່າທີ່ຂ້າພະເຈົ້າເຄີຍໄປມາ ສຳລັບການທ່ອງທ່ຽວຊົມນໍ້າຕົກຕາດ.. ເພາະຫຍັງ ເພາະການທ່ອງທ່ຽວຢູ່ຈຸດນີ້ ມັນມີຫຼາກຫລາຍໃຫ້ໄດ້ເບິ່ງໄດ້ເຫັນ  ມີທັງວັດທະນະທຳ ປະຫວັດສາດ ແລະ ທຳມະຊາດ  ນັ້ນເອງ.

---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com