ພົບພຣະພຸດທະຮູບຫີນເກົ່າແກ່ ວຽງຈັນຍຸກຕົ້ນ ທີ່ຈອມພູບ້ານຜາດ່າງ

ອີງຕາມການລາຍງານຂອງເຟຈArt and Culture of Laosໃນມື້ນີ້ ໃຫ້ຮູ້ວ່າ: ໄດ້ມີການຄົ້ນພົບ ພຣະ
ພຸດທະຮູບຫີນເກົ່າແກ່ ແຕ່ຍຸກວຽງຈັນຍຸກຕົ້ນ ທີ່ຈອມພູຂອງບ້ານຜາດ່າງ ເມືອງລ່ອງຊານ ແຂວງໄຊສົມບູນ ມີຈຳນວນ 5 ອົງ.

ສັນນິຖານເບຶ້ອງຕົ້ນວ່າ ຄົງຈະສ້າງມາແຕ່ສະໄຫມວຽງຈັນຍຸກຕົ້ນໆ ກໍ່ວ່າໄດ້ ເພາະຮູບຮ່າງລັກສະນະ ພຸດທະສິນແມ່ນມີລັກສະນະຄ້າຍຄືກັບ ພຣະພຸດທະຮູບ ຖ້ຳວັງຊ້າງ ເມືອງໂພນໂຮງ ແຂວງວຽງຈັນ ໃນສະໄຫມກ່ອນນັ້ນ. ມີເລື່ອງເລົ່າກັນ ໃນພວກນາຍພານລ່າສັດວ່າ ເປັນເຂດເຂັດ ເຂດທີມັກມີ
ພຣະທຸດົງ ມາປະຕິບັດທັມຕະຫລອດ ແລະເປັນເຂດຂອງເມືອງບັງບົດ ແລະຊາວບ້ານເຂດນັ້ນ
ມັກຈະມີເລື່ອງການເລົ່າຂ່ານວ່າ : ເລື່ອງພູຜາດ່າງ ນາງນອນ ຈະມີສິ່ງສັກສິດ ຢູ່ຕະຫລອດ. 

ໃນສະໄຫມກ່ອນນັ້ນ ເຂດນີ້ຂຶ້ນກັບເມືອງຮົ່ມ ແຂວງວຽງຈັນ ທັງສອງຂ້າງຂອງຈອມພູ
ທີ່ມີພຣະພຸດທະຮູບຫີນເກົ່າແກ່ນີ້ ຈະເປັນພຶ້ນທີ່ ທີ່ອຸດົມສົມບູນ ໃນການເຮັດໄຮ່ ເຮັດນາ ຂອງ 2 ຕາແສງ ຄື : ຕາແສງ ນາເຫລືອງ ແລະຕາແສງນາງເຄືອ ເມື່ອກ່ອນເຂດນີ້ຈະມີຜູ້ຄົນຢູ່ອາໄສຫລາຍ ເພາະຄວາມອຸດົມສົມບູນ ເຮັດໃຫ້ເປັນສະຖານທີ່ ທີ່ມີການຍາດຊິງກັນລະຫວ່າງ ແນວລາວຮັກຊາດ ກັບຝ່າຍ ພຣະຣາຊອານາຈັກ ຈຶ່ງເກີດມີການ ປຸກລະດົມຂອງທັງ 2 ຝ່າຍ ຈົນເຮັດໃຫ້ປະຊາຊົນແຍກຍ້າຍກັນໄປຄົນລະທິດທາງ ເຮັດໃຫ້ເຂດນີ້ເປັນເຂດຮ້າງ ແລະເປົ່າຫວ່າງບ້ານເຮືອນແລະຜູ້ຄົນ.

 ເຂດທີ່ມີຊື່ສຽງທີ່ຢູ່ໃກ້ຄຽງກັນແລະຕິດກັນນີ້ ກໍ່ແມ່ນ ເຂດຜາອວນ-ຜາຕາວ ເພາະເປັນເຂດທີ່ອຸດົມສົມບູນ ມີທົ່ງນາທີ່ຂຽວງາມ ໃນເຂດນີ້ຈຶ່ງນິຍົມມັກສ້າງພຣະພຸທທະຮູບ ຕາມແຮງສັດທາ ເພຶ່ອນຳໄປປະດິດສະຖານໃນຖ້ຳຂອງຜາວອນ-ຜາຕາວ ຢ່າງຫລວງຫລາຍ ປະຈຸບັນນີ້ ເຂດຜາອວນ-ຜາຕາວ ແມ່ນບໍ່ມີແລ້ວ ຍ້ອນຖືກເຂື່ອນນ້ຳງືມຖ້ວມ ແລະຖ້ຳຕ່າງໆ ທີ່ມີພຣະພຸທທະຮູບກໍ່ຈົ່ມໃນພຶ້ນນ້ຳ ແຕ່ຍັງປາກົດໃຫ້ເຫັນຍອດຂອງພູຜາອວນ-ຜາຕາວຢູ່. 

ແຂວງໄຊສົມບູນ ຄວນກຳນົດເອົາຈຸດແຫ່ງນີ້ເປັນແຫລ່ງທ່ອງທ່ຽວ ທາງວັດທະນະທັມ- ທຳມະຊາດ ເຂົ້າໃນຈຸດຫມາຍຫນຶ່ງຂອງແຂວງ ແລະນຳເອົາງົບປະມານມາພັດທະນາ ແລະສ້າງຫໍ ຫລືສິມມຸງພຣະພຸດທະຮູບດັ່ງກ່າວ ໃຫ້ເປັນບ່ອນສັກກະຣະບູຊາ ຈະໄດ້ທັງບູນ ໄດ້ທັງທຶນ ເຂົ້າແຂວງ ບໍ່ຫລາຍກໍ່ນ້ອຍ ແລະທີ່ສຳຄັນຄວນຈະຈັດຕັ້ງທຶນສຳຫລວດ ເພື່ອສຶກສາຄົ້ນຄວ້າ ປະຫວັດ ຄວາມເກົ່າແກ່ ຂອງສິ່ງທີ່ມີນີ້ໃຫ້ວິຊາການ ອອກເປັນປື້ມ ໄວ້ເປັນຖານຂໍ້ມູນສຶກສາຕໍ່ໄປ ( ຖ້າໄປສຳຫລວດແລະບູລະນະປະຕິສັງຂອນຊ້າ ຢ້ານມີຄົນບາບ ມາລັກເອົາໄປຂາຍ ເດີ ). 

 ຂອບໃຈຮູບພາບທີ່ມີຄຸນຄ່າຈາກ Ta Lor ຮີບໂຮມຂໍ້ມູນໂດຍ : Art and Culture of Laos

---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com