ປີນີ ນາງສັງຂານ ມີຊື່ວ່າ ມະໂຫທອນເທວີ ມືຂວາຖືກົງຈັກ ມືຊ້າຍຖືຫອກສາມງ່າມ ພາຫານະ ແມ່ນ ນົກຍຸງ

ຍັງອີກບໍ່ເທົ່າໃດວັນ ບຸນສົງການປີໃຫມ່ລາວ ພສ 2561 ກໍຈະໝູນວຽນບັນຈົບຄົບຮອດອີກວາລະຫນຶ່ງ. ມື້ນີ້ແອັດມີນຈິງຂໍນຳສະເຫນີປະຫວັດຄວາມເປັນມາກໍຄືມູນເຫດຂອງການເກີດມີບຸນສົງການມານຳສະເຫນີ

ກ່ຽວກັບວັນບຸນ ປີໃໝ່ລາວ ຫຼື ວັນສົງການນີ້ ມີນິທານເລື່ອງໜຶ່ງໄດ້ກ່າວໄວ້ວ່າ: ກາລະຄັ້ງໜຶ່ງດົນນານມາແລ້ວ ມີລູກເສດຖີຄົນໜຶ່ງ ຊື່ ທຳມະປະລະກຸມມານ ຫຼື ເອີ້ນວ່າ ທຳມະບານ ເປັນຄົນມີຄວາມຮູ້, ສະຫຼາດຫຼັກແຫຼມ ແລະ ສາມາດເຂົ້າໃຈພາສານົກໄດ້. ລາວໄດ້ອອກທ່ຽວສອນທຳມະ ແລະ ຄວາມຮູ້ໃຫ້ ແກ່ປວງຊົນທັງຫຼາຍ ເຊິ່ງເຮັດໃຫ້ຄົນທັງຫຼາຍ ສັດທາ ແລະ ເຄົາລົບນັບຖື ຈົນມີຊ່ືສຽງເລືອງລືໄປທົ່ວພິພົບ  ເຮັດໃຫ້ ພະຍາ ກະບິນລະພົມ ຢາກທົດສອບຄວາມສະຫຼາດຂອງ ທຳມະປະລະກຸມມານ. ພະຍາກະ ບິນລະພົມ ຈ່ຶງໄດ້ສະເດັດລົງມາຫາ ທຳມະປະລະກຸມມານ ແລະ ຕັ້ງຄຳຖາມ 3 ຂໍ້ ຄື:

1) ຕອນເຊົ້າ ສີລິຂອງຄົນຢູ່ໃສ ?

2) ຕອນທ່ຽງ ສີລິຂອງຄົນຢູ່ໃສ ?

 3). ຕອນກາງຄືນ ສີລິຂອງຄົນຢູ່ໃສ ?

 ໂດຍວາງ ເງື່ອນໄຂໄວ້ວ່າ: ຖ້າຕອບບໍ່ໄດ້ ພະຍາພົມກະບິນລະພົມ ຈະຕັດຫົວທ້າວ ທຳມະປະລະກຸມມານ ແຕ່ຖ້າຕອບໄດ້ ພະຍາ ກະບິນລະພົມ ຈະຕັດຫົວຂອງຕົນເອງ ແລະ ໃຫ້ເວລາ ແກ່ທ້າວ ທຳມະປະລະກຸມານ ໄປຄົ້ນຄິດ 7 ວັນ.
ພໍເຖິງວັນຖ້ວນ 3 ທ້າວທຳມະປະລະກຸມມານ ກໍຍັງ ຄິດຫາຄຳຕອບບໍ່ໄດ້ ຈ່ຶງຄິດວ່າຕົນຈະຕ້ອງ ຕາຍຍ້ອນຄົມດາບຂອງພະຍາ ກະບິນລະພົມ ເພ່ືອປະໂຫຍດອັນໃດ ຕົນຈະໜີໄປຕາຍເອົາດາບໜ້າ ຈະບໍ່ດີກວ່າບໍ?. ເວົ້າແລ້ວ ລາວກໍ່ອອກເດີນທາງ, ພໍຮອດຍາມຄ່ຳ ລາວໄດ້ໄປນອນຢູ່ກ້ອງຕົ້ນຕານ, ບັງເອີນ ໄດ້ຍິນນົກອິນຊີຜົວເມຍ ຄູ່ໜຶ່ງ ເຊິ່ງອາໄສຢູ່ເທິງຕົ້ນຕານ ລົມກັນ. ນົກຕົວເມຍຖາມຜົວວ່າ: ມື້ອ່ືນນີ້ ພວກເຮົາຈະເອົາອັນໃດມາເປັນອາຫານ, ນົກຕົວຜົວຈຶ່ງຕອບວ່າ: ຈະໄດ້ກິນຊາກສົບ ຂອງ ທຳມະປະລະກຸມມານ ທ່ີພະຍາກະບິນລະພົມ ຈະຂ້າເພາະຕອບຄຳຖາມ ບໍ່ໄດ້. ນົກຕົວເມຍສົນໃຈຈິ່ງຖາມຄືນວ່າ: ຄຳຖາມນັ້ນເປັນຄືແນວໃດ; ນົກຕົວຜູ້ ກໍເລີຍເວົ້າສູ່ເມຍຟັງ ແລະ ບອກຄໍາຕອບພ້ອມ ຄື: ຕອນເຊົ້າ ສີລິຂອງຄົນຢູ່ທ່ີໜ້າ ດັ່ງນັ້ນ ຄົນທັງຫຼາຍ ຈຶ່ງເອົານ້ຳສວ່າຍໜ້າ, ຍາມທ່ຽງ ສີລິຂອງຄົນຢູ່ເອິກ ຄົນທັງຫຼາຍ ຈ່ຶງເອົານ້ຳ ແລະ ຂອງຫອມ ລູບເອິກ, ຕອນຄ່ຳ ສີລິຂອງຄົນຢູ່ຕີນ ຄົນທັງຫຼາຍຈ່ຶງເອົານ້ຳລ້າງຕີນກ່ອນເຂົ້ານອນ.

  ເມື່ອທຳມະປະລະກຸມມານ ໄດ້ຍິນດ່ັງນັ້ນ ກໍຈື່ຈຳເອົາ ແລ້ວຕ່າວກັບຄືນຜາສາດຂອງຕົນ ແລະ ຕອບຄຳຖາມໄດ້ໃນວັນຕໍ່ມາ. ດ່ັງນັ້ນ ພະຍາກະບິນລະພົມ ຈ່ຶງຕ້ອງໄດ້ຕັດຫົວຂອງຕົນເອງ ດັ່ງທ່ີໄດ້ວາງເງື່ອນໄຂໄວ້.
  ກ່ອນຕັດຫົວຂອງຕົວເອງ ພະຍາກະບິນລະພົມ ໄດ້ເອີ້ນລູກສາວທັງ 7 ມາສັ່ງວ່າ: ພໍ່ຈະຕັດຫົວບູຊາ ທຳມະປະລະກຸມມານ; ຖ້າຫົວຂອງພໍ່ ຫາກຕົກລົງໃສ່ແຜ່ນດິນ ໄຟກໍຈະໃໝ້ໂລກ; ຖ້າໂຍນຂຶ້ນໄປ ເທິງຟ້າ ກໍຈະເກີດໄພແຫ້ງແລ້ງ; ຖ້າຖິ້ມລົງໃນມະຫາສະມຸດ ນ້ຳກໍຈະແຫ້ງ. ດັ່ງນັ້ນ ໃຫ້ພວກລູກ ທັງ 7 ຄົນເອົາພາພານ ມາຮອງຮັບເອົາຫົວຂອງພໍ່ໄວ້ ແລ້ວເຊີນໄປຕັ້ງໄວ້ໃນຖ້ຳຄັນທະທຸລີ ທີ່ພູເຂົາໄກລາດ ແລະ ບູຊາດ້ວຍເຄື່ອງ ສັກກາລະທິບຕ່າງໆດ້ວຍເຖີ້ນ.

ເມື່ອຄົບຮອບເວລາ ໃນແຕ່ລະປີ ດັ່ງວັນປີໃໝ່ ຫຼື ວັນສົງການ ລູກສາວທັງ 7 ກໍປ່ຽນຜຽນ ກັນຕາມລຳດັບ ພາບໍລິວານ ແລະ ເທບພະຍະດາ ທັງຫຼາຍ ມາເຊີນເອົາຫົວຂອງ ພະຍາກະບິນລະພົມ ອອກມາຫົດສົງ ແລະ ແຫ່ວຽນອ້ອມ. ຫຼັງຈາກນັ້ນ ຂະບວນກໍນຳຫົວຂອງພະຍາກະບິນລະພົມ ໄປໄວ້ທ່ີເດີມ. ສະນັ້ນ ເພິ່ນຈຶ່ງເອີ້ນ ລູກສາວທັງ 7 ຂອງ ພະຍາກະບິນລະພົມ ວ່າ ນາງສັງຂານແຕ່ນັ້ນມາ.
  ນາງສັງຂານທັງ 7 ນີ້ສະເດັດມາໃນທ່າຕ່າງກັນ ເຊິ່ງເພິ່ນຖືວ່າເປັນສັນຍາລັກໃຫ້ແກ່ແຕ່ລະວັນ ເຊັ່ນ:
+ ນາງສັງຂານຜູ້ທ່ີເປັນສັນຍາລັກໃຫ້ແກ່ ວັນເສົາ ແມ່ນ ນາງມະໂຫທອນ ທັດດອກຜັກຕົບ, ລາວມັກ ຊີ້ນຊາຍ (ສັດປະເພດຟານ) ມີອາວຸດ ຄື ມືຂວາຖືກົງຈັກ ມືຊ້າຍຖືຕຣີສູນ (ຫອກສາມງ່າມ) ພາຫະ ນະ ແມ່ນ ນົກຍຸງ;

+ ວັນອາທິດ ຊ່ືວ່ານາງທຸງສະເທວີ ມັກກິນ ໝາກເດ່ືອເປັນອາຫານ ຖືອາວຸດຄື ມືຂວາຖື ກົງຈັກ ມືຊ້າຍຖື ສັງ(ຫອຍສັງ) ແລະ ພາຫະນະ ແມ່ນ ຄຸດ;
+ສັນຍາລັກຂອງວັນຈັນ ແມ່ນ ນາງ ໂຄລາຄະເທວີ ທັດດອກກາງຂອບ (ຊື່ຂອງດອກໄມ້ຊະນິດຫນຶ່ງ) ເຄື່ອງປະດັບ ເປັນແກ້ວ ແລະ ມຸກ, ອາຫານ ໄດ້ ແກ່ ນ້ຳນົມ ໃນມືຖື ພະຂັນ (ດາບ) ມືຊ້າຍ ຖືໄມ້ເທົ້າ, ພາຫະນະ ແມ່ນ ເສືອ;
+ວັນອັງຄານແມ່ນ ນາງ ຮາກສະເທວີ ທັດດອກບົວຫຼວງ ພ້ອມດ້ວຍເຄື່ອງປະດັບແກ້ວໂມຣາ, ອາຫານ ແມ່ນ ໂລຫິດ (ເລືອດ) ມືຂວາຖື ຕຼີສູນ ມືຊ້າຍຖືທະນູ ພາຫະນະ ແມ່ນ ໝູ;

+ສັນຍາລັກຂອງວັນພຸດ ແມ່ນ ນາງ ມົນທາເທວີ ທັດດອກຈຳປາ ພ້ອມດ້ວຍ ເຄື່ອງປະດັບແກ້ວພິທູນ, ອາຫານ ແມ່ນນົມເນີຍ ແລະ ມືຂວາຖືເຂັມ ມືຊ້າຍ ຖືໄມ້ ເທົ້າ ພາຫະນະ ແມ່ນ ລໍ;
+ສັນຍາລັກຂອງວັນພະຫັດ ແມ່ນ ນາງ ກິຣິນີເທວີ ທັດດອກມົນທາ (ແມ່ນຊື່ຂອງດອກໄມ້ຊະນິດຫນຶ່ງ) ພ້ອມດ້ວຍເຄື່ອງປະດັບແກ້ວມໍລະກົດ, ອາຫານແມ່ນ ຖົ່ວງາ, ມືຂວາ ຖືຂໍ ມືຊ້າຍຖືປືນ ພາຫະນະ ແມ່ນ ຊ້າງ;
+ສັນຍາລັກຂອງວັນສຸກ ແມ່ນ ນາງ ກິມິທາເທວີ ທັດດອກຈັງກອນ ພ້ອມ ດ້ວຍເຄື່ອງປະດັບແກ້ວບຸດສະຣາຄຳ, ອາຫານ ແມ່ນ ກ້ວຍນ້ຳ, ອາວຸດໃນມືຂວາ ແມ່ນພະຂັນ, ມືຊ້າຍ ຖືພິນ, ພາຫະນະ ແມ່ນ ຄວາຍ.
ອີງຕາມປະເພນີສືບຕໍ່ກັນມາ ເມື່ອເຖິງວັນສັງຂານແລ້ວ ຍາມເຊົ້າຄົນທັງປວງພາກັນອອກໄປເຮັດ ບຸນ ຕັກບາດຢູ່ວັດ, ໄຫວ້ພະພຸດທະຮູບ, ພະທາດເຈດີດ້ວຍດອກໄມ້ທູບທຽນ ແລະ ກໍນິມົນເອົາພະພຸດທະຮູບ ລົງມາຈາກຮ້ານພະ ເພື່ອມາປະດິດສະຖານໄວ້ທ່ີໂຮງ ເພ່ືອຫົດສົງ ເອີ້ນວ່າ “ເອົາພະລົງ”.

ເມື່ອເຖິງ ເວລາຄ່ຳຄືນ ໃນລະຫວ່າງວັນສັງຂານນີ້ ກໍພາກັນກໍ່ພະທາດ ເຈດີ ດ້ວຍດິນຊາຍ ເອີ້ນວ່າ “ຕົບພະທາຍ”, ທຳບຸນໃຫ້ທານ, ຟັງທຳມະເທດສະໜາ, ເຮັດບັງສະກຸນເພື່ອເຮັດທານຫາຜູ້ທີ່ລ່ວງລັບໄປຕາມສັດທາຂອງໃຜລາວ ເປັນຕົ້ນ. ເມື່ອເຖິງວັນທີສາມ ຄືວັນສັງຂານຂຶ້ນ ພະພິຂຸສົງ ກໍຈະນິມົນເອົາພະພຸດທະຮູບທຸກອົງ ຂຶ້ນຄືນໄວ້ແທ່ນເດີມ ເຊິ່ງເຮົາເອີ້ນວັນນີ້ວ່າ ວັນສັງຂານຂຶ້ນ ຫຼື ວັນຂຶ້ນປີໃໝ່ນັ້ນເອງ. ຫຼັງຈາກທ່ີນິມົນພະຂຶ້ນແທ່ນຄືນແລ້ວ ພິທີການສະເຫຼີມສະຫຼອງ ປີໃໝ່ລາວກໍສິ້ນສຸດລົງ. ໃນໄລຍະຕົ້ນຂອງປີໃໝ່ນີ້ ແຕ່ລະຄອບຄົວກໍມັກຈັດບາສີສູ່ຂວັນກັນເພ່ືອຮັບໂຊກໄຊໃໝ່.

ຂອບໃຈຮູບຈາກ
jenny phonesavanh
diamond studio, wedding studio, laos
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com