 |
| ຕາດນົກອິນຊີ |
ນ້ຳຕົກຕາດນົກອິນຊີ ແມ່ນຕາດທີ່ງົດງາມ ເຊິ່ງເປັນໜື່ງໃນຈຳນວນຕາດຕ່າງໆ ໃນເຂດ ນ້ຳຕົກຕາດ ຕາຢຶກເສືອ, ເມືອງປາກຊ່ອງ, ແຂວງຈຳປາສັກ. ຄວາມງົດງາມຂອງນ້ຳຕົກແຫ່ງນີ້ ສາມາດຊົມຈາກຈຸດຊົມວິວດ້ານເທີງ, ທ່ານຈະເຫັນທຳມະຊາດ, ປ່າໄມ້ ແລະ ສຽງນ້ຳຕົກອັນອອນຊອນ ດັ່ງສຽງດົນຕີທີ່ທຳມະຊາດປັ້ນແຕ່ງ. ນອກຈາກນີ້, ຫາກທ່ານມັກຄວາມທ້າທາຍ ກໍ່ສາມາດທີ່ຈະຍ່າງລົງໄປດ້ານລຸ່ມຂອງຕາດ ແຕ່ມີຄວາມລ້ຳບາກ ເພາະທາງຂ້ອນຂ້າງຄ້ອຍຊັນ. ແຕ່ເມື່ອລົງໄປຮອດດ້ານລຸ່ມຂອງຕາດ ບອກໄດ້ເລີຍວ່າສຸດຄຸ້ມແທ້ໆ.
ຄວາມເປັນມາຂອງການຕັ້ງຊື່ຕາດນົກອິນຊີ ຕາມຊາວບ້ານເລົ່າສູ່ຟັງແມ່ນ ໃນເມື່ອກ່ອນຕາດແຫ່ງນີ້ຈະມີນົກອິນຊີ ຈຳນວນຫຼາຍ ບິນມາອາໃສໃກ້ເຂດຕາດດັ່ງກ່າວ. ນົກເຫຼົ່ານີ້ ມັກບິນລົງໄປກິນນ້ຳ ແລະ ຫາອາຫານ.
ການເດີນທາງຈາກເມືອງປາກເຊໄປຫາຕາດນົກອິນຊີ ແມ່ນສະດວກສະບາຍ, ທ່ານຈະໃຊ້ເວລາປະມານ 1 ຊົ່ວໂມງ ຈາກປາກເຊ ຫາຕົວເມືອງປາກຊ່ອງ ຈາກນັ້ນກໍ່ເດີນທາງໄປຫາເຂດ ຕາຢຶກເສືອ ອີກປະມານ 30 ນາທີ ກໍ່ສາມາດເຂົ້າຮອດຕາດໄດ້ແລ້ວ. ທ່ານສາມາດເດີນທາງດ້ວຍລົດຈັກ, ລົດຕູ້ ແມ່ນສະດວກດີ. ຫາກທ່ານຕ້ອງການຄວາມຊ່ວຍເຫຼືອຈາກຄົນທ້ອງຖິ່ນ ແມ່ນແນະນຳ ໃຫ້ສອບຖາມ ບໍລິສັດນຳທ່ຽວທີ່ປາກເຊ ເພື່ອວາງແຜນການເດີນທາງ.
ນະສະຖານທີ່ ຕາດນົກອິນຊີນີ້ ທາງຜູ້ຮັບຜິດຊອບ ເພິ່ນມີທີ່ພັກ ແບບເຮືອນຊົນເຜົ່າ ແລະ ເຮືອແບບລາວ ທີ່ສະດວກ ມີຫ້ອງນ້ຳສະອາດ, ມີຫ້ອງອາຫານ (ແບບເປັນກັນເອງທ່ານສາມາດເຂົ້າຄົວແຕ່ງກິນເອງໄດ້ເລີຍ), ຄ່າທີ່ພັກ ກໍ່ພຽງຄົນລະ 60,000 ກີບ ເທົ່ານັ້ນ. ສ່ວນຄ່າອາຫານ ກໍ່ແລ້ວແຕ່ຄົນກິນໜ້ອຍກິນຫຼາຍ, ແຕ່ບອກໄດ້ເລີຍວ່າ ທ່ານຈະໄດ້ກິນອາຫານປອດສານພິດ ແລະ ໄດ້ສຳພັດກັບຄວາມລົງຕົວຂອງທຳມະຊາດແ່ນນອນ. ພິເສດ! ຫາກທ່ານຕ້ອງການສົ່ງຄວາມງົດງາມຂອງທຳມະຊາດ ມາອວດໝູ່ເພື່ອນ ທາງເຟສບຸກ ແລ້ວ ທ່ານສາມາດເຮັດໄດ້ທັນທີ່ ເພາະເຂດດັ່ງກ່າວ ທາງຣິສອດ ເພິ່ນມີອິນເຕີເນັດໃຫ້ໃຊ້ ແຕ່ຈະເປີດໃຫ້ເປັນຍາມເທົ່ານັ້ນ, ເນື່ອງຈາກວ່າ ເພິ່ນຕ້ອງການໃຫ້ຜູ້ມາຢ້ຽມຢາມໄດ້ສຳພັດ ກັບຄວາມເປັນທຳມະຊາດ ແລະ ໃຊ້ເວລາ ໄດ້ໂອ້ລົມກັບຄົນອ້ອມຂ້າງ.
ທີມງານ ຮູບພາບເມືອງລາວ - Lao Postcard ຫວັງວ່າ ຈະເປັນປະໂຫຍດແກ່ທ່ານໃນການເດີນທາງ ໄປທ່ຽວທຳມະຊາດເມືອງລາວ, ໂອກາດໜ້າຈະສັນຫາເລື່ອງລາວ ທີ່ມີເນື້ອໃນ ແລະ ລາຍລະອຽດໃຫ້ຫຼາຍກວ່ານີ້. ດ້ານລຸ່ມມີຄລີບວິດີໂອ ຂອງຕາດນົກອີນຊີໃຫ້ທ່ານໄດ້ຊົມເດີ!
ຄຳແນະນຳ ສຳລັບຄົນທີ່ບໍ່ເຄີຍເດີນທາງ ຕາມພູຜ່າປ່າດົງ: ແມ່ນໃຫ້ທ່ານກະກຽມຕົນເອງ ໂດຍການຍ່າງ ຫຼື ແລ່ນ ອອກກຳລັງກາຍ ຢ່າງໜ້ອຍ 2 ອາທິດ ກ່ອນການເດີນທາງ, ໃຫ້ກະກຽມເກີບ ທີ່ເໝາະສົມສຳລັບການເດີນປ່າ, ຫ້າມເດັດຂາດເອົາເກີບຄີບ ເກີບແຕະໄປ ເພາະເວລາຍ່າງຕາມປ່າແມ່ນຍາກຫຼາຍ. ໃຫ້ພາກັນກະກຽມ ກະເປົາທີ່ສາມາດກັນນ້ຳໄດ້ ເພາະເວລາລົງໄປຫຼີ້ນນ້ຳຈະປອດໄພ. ຢ່າກັນຍຸງ, ນ້ຳດຶ່ມ, ແລະ ເຂົ້າໜົມເພີ່ມພະລັງ ກໍ່ໃຫ້ກະກຽມ (ໝາຍເຫດ: ເວລາກິນແລ້ວ ຢ່າຖີ້ມຂີ້ເຫຍື້ອຕາມປ່າຕາມດົງ, ໃຫ້ເກັບໃສ່ກະເປົາ ແລ້ວເອົາມາຖີ້ມຕາມບ່ອນກຳນົດເດີ!)
ດ້ວຍຄວາມຮັກແພງ
ທີມງານ ຮູບພາບເມືອງລາວ - Lao Postcard
Nok Insee Waterfall, Paksong District, Champasack Province
ຕາດນົກອິນຊີ, ເມືອງປາກຊ່ອງ, ແຂວງຈຳປາສັກNok Insee Waterfall, Paksong District, Champasack Provinceອ່ານລາຍລະອຽດທີ່ / More at : http://bit.ly/NokInseeWaterfall-----------------------------------#Laos #Paksong #Champasack #ລາວ #ປາກຊ່ອງ #ຈຳປາສັກ #Tayicseua #ຕາຢຶກເສືອ
Posted by Lao Postcard - ຮູບພາບເມືອງລາວ on Saturday, 10 October 2015
 |
| ຈຸດຂອງຕາດນົກອິນຊີ ໃນເຂດຂອງຕາດຕາຢຶກເສືອ |
