ທຸກໆປີ ກ່ອນຈະຮອດພິທີບຸນສະເຫລີມສະຫລອງປີໃຫມ່ລາວ ທີຫລວງພຣະບາງ ຕ້ອງມີພິທີຂະບວນແຫ່ຊ້າງຮຽງເກີຍ ຈາກວັດໃຫມ່ ສຸວັນນະພູມມາຣາມ ໄປຫາ ວັດຊຽງທອງ ປີນີ້ແມ່ນເພິ່ນຈັດຂຶ້ນຕອນເຊົ້າ ໃນວັນທີ່ 13 ເມສາ 2017 ນຳໜ້າຂະບວນແຫ່ ແມ່ນນາງພະຍາຊ້າງເຜືອກ
ຄວາມໝາຍຄຳວ່າຊ້າງຮຽງເກີຍ ສະໄໝກ່ອນແມ່ນການແອບຊ້າງກ່ອນເຂົ້າສູ່ສະໜາມຮົບໂດຍມີຄຳເວົ້າບາງຕອນໃນພິທີຮຽງເກີຍນັ້ນວ່າ : ເວລາອອກສູ້ຮົບນັ້ນ ເຈົ້າຢ່າໄດ້ງວກຊ້າຍ-ງວກຂວາ ໃຫ້ໄປໜ້າຕິກໆ ຄັນໄດ້ຍິນສຽງຄົນຮ້ອງໂຮແຊວຢູ່ທາງໜ້າແມ່ນສັດຕູ.
ແລະມີອີກຄວາມໝາຍຫນຶ່ງໃນເມື່ອກ່ອນທີ່ມີຄວາມເຊື່ອກັນວ່າ ແມ່ນພິທີກັມທີ່ກ່ຽວກັບເສົາຫລັກບ້ານຫລັກເມືອງ ທີ່ມີການເຊື່ອມຕໍ່ກັນລະຫວ່າງດິນກັບຟ້າ ໂດຍມີຊ້າງເປັນພາຫະນະຂອງພຣະອິນ ຫລືພຣະຍາແຖນ ເຊິ່ງເປັນສັນຍາລັກຂອງເຈົ້າມະຫາຊີວິດໃນຕົວລະຄອນຫລັກ, ພິທີຮຽງເກີຍຈຶ່ງເປັນພິທີກັມ ທີ່ຂຶ້ນຟ້າຂຶ້ນແຖນ ເພື່ອເປັນການ ຄອບລາ ຫລືບອກກ່າວການປ່ຽນສັກກະຣາຊ ປີເກົ່າ ໄປສູ່ປີໃຫມ່
 |
| Add caption |
