ທຸງສາສະໜາພຸດສາກົນ
ທຸງສາສະໜາພຸດສາກົນ ມີຊື່ທີ່ເວົ້າຕາມພາສາບາລີວ່າ : ທຸງສັບພະຣັງສີ ແປວ່າລັດສະໝີ 6 ສີເຊິ່ງມີທີ່ມາຈາກສີຂອງຣັງສີ ທີ່ແຜ່ອອກຈາກພຣະວໍຣະກາຍ ຂອງ ພຣະສັມມາສັມພຸທທະເຈົ້າ ເຊິ່ງປະກອບມີສີດັ່ງນີ້ :
- ສີນີລະ - ສີຟ້າແກ່
- ສີປີຕະ - ສີເຫລືອງ
- ສີໂຣຫິຕະ - ສີແດງຄືສີແດງຕາເວັນອ່ອນ
- ສີໂອທະຕະ - ສີຂາວ ຄືສີເງິນຮາງ
- ມີມັນຍະເຊດຖະ - ສີນ້ຳໝາກກ້ຽງ ຄືສີຫງອນໄກ່
- ສີປະພັດສອນ - ສີເຫລືອມ ຄືແກ້ວຜະລຶກ (ຄືສີທັງ 5 ທີ່ເວົ້າມາລວມກັນ )
ສີໃນທຸງສັພພະຣັງສີ ແຕ່ລະສີແມ່ນມີຄວາມຫມາຍແຝງຢູ່ຄື :
| ສີນີລະ : ພຣະມະຫາກະຣຸນາທິຄຸນຂອງພຣະສັມມາສັມພຸທທະເຈົ້າ ທີ່ແຜ່ໄພສານໄປທົ່ວສາກົນຈັກກະວານ |
|---|
| ສີປີຕະ : ມັດຊິມາປະຕິປະທາ ຫລືທາງສາຍກາງ ຄືການຫລີກເສັ້ນທາງແຫ່ງຄວາມສຸດໂຕ່ງທັງປວງ |
| ສີໂຣຫິຕະ : ການອຳນວຍພອນໃຫ້ປະສົບຄວາມສຳເຣັດ ສົມບູນພ້ອມດ້ວຍສະຕິປັນຍາ ຄຸນງາມຄວາມດີ ຄວາມເປັນຜູ້ມີໂຊກ ແລະກຽດຕິຍົດທັງປວງ |
| ສີໂອທະຕະ : ຄວາມບໍຣິສຸດແຫ່ງພຣະທັມ ເຊິ່ງເປັນສິ່ງທີ່ບໍ່ຈຳກັດກາລ (ອະກາລິໂກ) ແລະນຳຜູ້ຄົນໄປສູ່ຄວາມຫລຸດພົ້ນ |
| ສີມັນຍະເຊດຖະ : ພຣະປັນຍາທິຄຸນແຫ່ງພຣະສັມມາສັມພຸທທະເຈົ້າ |
| ສີປະພັດສອນ : ຄວາມຈິງທັງຫມົດໃນພຣະທັມຄຳສອນຂອງພຣະສັມມາສັມພຸທທະເຈົ້າ |
ປະຫວັດຂອງການນຳໃຊ້ທຸງນີ້ :
ທຸງນີ້ອອກແບບໂດຍ ພຸທທະສະມາຄົມໂຄລຳໂບ ເມື່ອປີ ພ.ສ 2423 (ຄສ 1880) ພັນເອກເຮນຣີ ເອັດ. ໂອຄອດ ເປັນຜູ້ແກ້ໄຂໃຫ້ເປັນແບບທີ່ໃຊ້ໃນປະຈຸບັນນີ້ ເລິ່ມນຳໃຊ້ເປັນຄັ້ງທຳອິດເມື່ອປີ ພສ 2428 ( ຄສ 1885 ) ທີ່ປະເທດສຼີລັງກາ ຕໍ່ມາອົງການພຸທທະສາສະໜາສະນິດສັມພັນແຫ່ງໂລກ (World Fellowship of Buddhists - WFB) ໄດ້ປະກາດໃຫ້ທຸງນີ້ເປັນທຸງພຸທທະສາສະໜາສາກົນ ເມື່ອວັນທີ່ 26 ພຶດສະພາ ພສ 2493 ( ຄສ 1950 ) ທີ່ນະຄອນຫລວງໂຄລຳໂບ ປະເທດສີລັງກາ .
