ຄິດຮອດການເດີນທາງສູ່ຖໍ້າກອງລໍ-ນາຕານ...ຄວາມງາມລີ້ລັບທີ່ທ່ານສາມາດໄປສຳຜັດໄດ້

ບັນດາຖໍ້າຕ່າງໆທີ່ຢັງຢາຍຕາມສາຍພູຫີນປູນ ແລະ ຫີນໜາມຫນໍ່ ຖືເປັນມົນສະເຫນສໍາຄັນຂອງ ດິນແດນສີໂຄດຕະບອງທີ່ມີປະຫວັດສາດຄວາມເປັນມາອັນຍາວນານແຫ່ງນີ້.

 3ປີມາແລ້ວທີ່ຂ້າພະເຈົ້າ ກັບທີມງານ Lao Photo Magazine ເຖິງວ່າມື້ນີ້  Lao Photo Magazine ບໍ່ໄດ້ຄືນແລະ ຢຸດການເຮັດວາລະສານຮູບອອນລາຍມາດົນສົມຄວນ ແຕ່ທຸກຄົນກໍຍັງເດີນຢູ່ໃນເສັ້ນທາງສາຍຊ່າງພາບຢູ່ ຂະນະທີ່ບາງຄົນກໍກ້າວສູ່ລະດັບຕົ້ນໆຂອງເມືອງລາວ ແລະ ເປັນທີ່ີຮູ້ຈັກໃນເວທີສາກົນພໍສົມຄວນ.

ພວກເຮົາຕັດສິນໃຈເດີນທາງພະຈົນຖ່າຍຮູບຖໍ້າຕ່າງໆຢູ່ດິນແດນພະຍາສີໂຄດ ໂດຍມີເປົ້າໝາຍສູງສຸດຂອງການເດີນທາງທີ່ຖໍ້ານໍ້າລອດເຊບັ້ງໄຟ ທີ່ເມືອງ ບົວລະພາ ເພາະມີຄໍາກ່າວຂານວ່າງົດງາມອະລັງການ ບໍ່ຫນ້ອຍຫນ້າ ມໍລະດົກໂລກທາງດ້ານທໍາມະຊາດຟອງຢາເກບັງ( PhangNhaKe Bang)ຂອງຫວຽດນາມ ທີ່ຢູ່ຕິດກັນ ແລະ ລັດຖະບານລາວ ກໍພວມກະກຽມການສະເໜີພູຫີນໜາມຫນໍ່(ຖໍ້ານໍ້າລອດເຊບັ້ງໄຟເປັນສ່ວນຫນຶ່ງໃນສາຍພູດັ່ງກ່າວ) ເປັນສະຖານທີ່ມໍລະດົກໂລກທາງດ້ານທໍາມະຊາດ.

ແຕ່ກ່ອນການເດີນທາງຕົວຈິງ ກໍມີເຫດການພິກປີ້ນ ເນື່ອງຈາກມີສະພາບຝົນຕົກແຮງຫລາຍວັນ ເຊິ່ງມີລາຍງານວ່ານໍ້າຫ້ວຍຫຍ້າແວດຂຶ້ນສູງ ປະກອບກັບການຊອກຫາຂໍ້ມູນທີ່ຍັງບໍ່ຊັດເຈນ ຕະຫລອດຮອດການຫ້າງຫາອຸປະກອນບໍ່ທ່ວງທັນ. ສຸດທ້າຍ ກໍຕັດສິນໃຈເດີນທາງໄປຖໍ້າກອງລໍ ເມືອງຄູນຄໍາກ່ອນ, ໂອກາດຫນ້າກະກຽມຄວາມພ້ອມດີຈິ່ງຈະເດີນທາງໄປພິຊິດຖໍ້າເຊບັ້ງໄຟໃຫ້ໄດ້.(ໄດ້ໄປຕົວຈິງໃນອີກ 2ປີຕໍ່ມາ)

ຕະຫລອດໄລຍະທາງປະມານ300ກິໂລແມັດຈາກນະຄອນຫລວງວຽງຈັນສູ່ຖໍ້າກອງລໍເມືອງຄູນຄໍາ ແຂວງຄໍາມ່ວນ ກໍມີສະພາບຝົນຕົກເປັນຍ່ານໆ ແຕ່ກໍພໍມີທ້ອງຟ້າງາມໆໃຫ້ໄດ້ເຫັນເປັນບາງໂອກາດ.

ເມື່ອລົດແລ່ນຕາມທາງເລກ 8 ມາເຖິງບໍລິເວນຫຼັກທີ 37ເຂດພູຜາຫມ່ານ ພວກເຮົາ(5ຄົນ)ກໍແວ່ພັກທີ່ສາລາຊົມວິວ ເພື່ອເບິ່ງທັດສະນິຍະພາບພູຜາຫມ່ານທີ່ເຕັມໄປດ້ວຍຫີນຫນາມຕັ້ງສະຫງ່າຢ່າງງົດງາມລວມເຖິງທິວທັດທໍາມະຊາດເບື້ອງຖໍ້າກອງລໍທີ່ແນມເຫັນສຸດສາຍຕາ.ຈາກນັ້ນພວກເຮົາກໍມຸ່ງຫນ້າຕໍ່ພໍຮອດ 3 ແຍກປໍ້ານໍ້າມັນບ້ານຄູນແກ້ວກໍລ້ຽວຂວາອີກປະມານ 40 ກິໂລແມັດ ກໍເຖິງບ້ານກອງລໍ

ຫລັງຈາກທີ່ມ້ຽນມັດເຄື່ອງແລ້ວ ພວກເຮົາກໍອອກເດີນທາງໄປຖໍ້າກອງລໍທັນທີ່ ເຊິ່ງຫ່າງຈາກທີ່ພັກປະມານ 500 ແມັດ ເພື່ອພົບປະໂອ້ລົມກັບທ່ານ ວິໄລສັກ ສຸວັນນະລາດ ຮອງຫົວຫນ້າຫ້ອງການຖະແຫລງຂ່າວວັດທະນະທໍາ ແລະ ທ່ອງທ່ຽວເມືອງຄູນຄໍາ, ທ່ານຄໍາສິງ ສານຸວົງ ຮອງສະມາຄົມເຮືອນໍາທ່ອງ ແລະ ຄະນະຈໍານວນຫນຶ່ງ ໂດຍໄດ້ສົນທະນາເຖິງການພັດທະນາດ້ານການທ່ອງທ່ຽວຢູ່ເມືອງຄູນຄໍາ ເປັນຕົ້ນແມ່ນການພັດທະນາກິດຈະກໍາທ່ອງທ່ຽວຢູ່ຖໍ້າກອງລໍ.

ພາຍຫລັງໂອລົມສົນທະນາທໍາຄວາມເຂົ້າໃຈກ່ຽວກັບການພັດທະນາຂະແຫນງບໍລິການທ່ອງທ່ຽວຂອງເມືອງຄູນຄໍາແລ້ວ. ທາງຖວທເມືອງ ແລະ ສະມາຄົມເຮືອກໍໄດ້ໃຫ້ການສະຫນັບສະຫນູນເຮືອສອງລໍາ ພາທີມງານພວກເຮົາເຂົ້າໄປຖ່າຍຮູບໃນຖໍ້າກອງລໍ.

ພວກເຮົາເລີ່ມເຂົ້າຖໍ້າເວລາປະມານ14:00ໂມງ ໃຊ້ເວລາຖ່າຍຮູບ ແລະເດີນທາງໄປຈົນເຖິງເບື້ອງບ້ານນາຕານ ເມືອງບົວລະພາ ແລະ ກັບອອກມາໃນເວລາ16:30ໂມງ ລວມເວລາ2ຊົ່ວໂມງເຄິ່ງ ເຊິ່ງ ກໍໄດ້ຮູບພາບຫລາຍສົມຄວນ ແຕ່ການຖ່າຍຮູບໃນຖໍ້າກໍເປັນອີກຫນຶ່ງປະສົບການໃຫມ່ຂອງທີມງານ ເຊິ່ງຈະ ຕ້ອງໄດ້ຮຽນຮູ້ກັນຕື່ມພໍສົມຄວນ(555 ຕ້ອງໄດ້ຝຶກຫນັກອີກ)

ກອງລໍ ເປັນຖ້ຳນ້ຳລອດທີ່ໃຫຍ່ທີ່ສຸດແຫ່ງຫນຶ່ງຂອງໂລກ ມີຄວາມຍາວ7,5ກິໂລແມັດ. ຕັ້ງຢູ່ບ້ານກອງລໍ ນາຕານ ຫ່າງຈາກເທດສະບານ ເມືອງຄູນຄໍາ ປະມານ 46 ກິໂລແມັດ. ເປັນຖໍ້າທີ່ສາຍນ້ຳຫີນບູນໄຫລຜ່ານອຸໂມງພູຫີນປູນ ພາຍໃນຖ້ຳມີແກ້ງ ມີຫີນຍ້ອນ, ຫີນງອກ ແລະ ຫາດຊາຍ.

ສາມາດຂີ່ເຮືອຂຶ້ນລ່ອງໄປໃນຖ້ຳ, ລະດູແລ້ງ ເປັນໄລຍະທີ່ເໝາະສົມຫລາຍໃນການເຂົ້າໄປທ່ຽວຊົມສີສັນຂອງໃນຖ້ຳເພາະລະດັບນ້ຳຫລຸດລົງ, ສ່ວນຍາມຝົນນ້ຳຫລາຍ ແລະ ອັນຕະລາຍ.

ສຳລັບຄ່າເຮືອເຂົ້າຖ້ຳແມ່ນ 1 ແສນກີບຕໍ່ຄົນກຳນົດໃຫ້ຂີ່ບໍ່ເກີນລຳລະ 3  ຄົນ, ນອກນັ້ນກໍມີປິ້ເຂົ້າຖ້ຳອີກທ່ານລະ10.000ກີບຕໍ່ຄົນ.

ດ້ານໃນຂອງຖໍ້າກອງລໍ ເມືອງຄຸນຄຳ ແຂວງຄຳມ່ວນ

ທີມງານທັງ 5 ທີ່ຮ່ວມເດີນທາງ

---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com