ພຣະທາຕຸແຂ້ວຝາງ ຂອງພຣະພຸທທະເຈົ້າ ທີ່ເຊື່ອວ່າປະດິດສະຖານຢູ່ທີ່ ວັດນາຄ ຫໍ່ຜ້າ ຮ່ອງແພ ເຂດບ້ານຫ້ອມ ເມືອງຫາດຊາຍຟອງ ນະຄອນຫລວງວຽງຈັນ
ວັດນາຄ ຫໍ່ຜ້າ ຮ່ອງແພ ເຂດບ້ານຫ້ອມ ເມືອງຫາດຊາຍຟອງ ນະຄອນຫລວງວຽງຈັນ ຕາມຕຳນານ ອຸຣັງຄະນິທານ ໄດ້ກ່າວໄວ້ວ່າ : ເມື່ອກ່ອນມີພຣະອໍຣະຫັນ 3 ອົງ ຄື ພຸທທະຮັກຂິຕະ ທັມມະຮັກຂິຕະ ສັງຄະຮັກຂິຕະ ທີ່ເດິນທາງມາຈາກຊົມພູທະວີບ ( ອີນເດຍ ສະໄຫມເຈົ້າອະໂສກ ມະຫາຣາຊ ) ໄດ້ເຂົ້າມາເຜີຍແຜ່ພຸທທະສາສະໜາສູ່ດິນແດນໃນແຖວປະເທດລາວ ການມາເຜີຍແຜ່ພຸທທະທັມໃນເຂດແຄວ້ນນີ້ ໂດຍຮີບໂຮມເພື່ອສັງສອນພຣະທັມ ຈາກຫລາຍຮ້ອຍຄົນ ຄັດເຂົ້າມາບວດ ຈົນໄດ້ພຣະທີ່ປະຕິບັດດີ ປະຕິບັດຊອບຈຳນວນ 5 ອົງ ຈາກນັ້ນຈຶ່ງສົ່ງພຣະຈຳນວນ 5 ອົງທີ່ຄັດເລືອກນີ້ ໄປສຶກສາພຣະທັມທີ່ເມືອງຣາຊະຄື ອິນເດຍ ພ້ອມດ້ວຍຄະນະ 20 ອົງໄປໃນຄັ້ງນັ້ນດ້ວຍ ຫລັງຈາກ 2 ປີ ຈຶ່ງໄດ້ຮຽນຈົບ ທີ່ເມືອງຣາຊຄື ທີ່ອິນເດຍແລ້ວ ຈຶ່ງໄດ້ກັບຕ່ວງຄືນມາສູ່ດິນແດນບ້ານເກີດໂດຍເອງ ໂດຍໄດ້ນຳຫລັກທັມຂອງພຣະສັມມາສັມພຸທທະເຈົ້າ ແລະທີສຳຄັນໄດ້ນຳເອົາພຣະບໍຣົມສາຣິຣິກະທາຕຸຂອງພຣະບໍຣົມສາສະດາ ເຊັ່ນ ກະດູກຫົວເນົາ , ກະດູກແຂ້ວຝາງ... ແລະໄດ້ນຳມາບັນຈຸໃນອູບມຸງຕາມຖິ່ນແຄວ້ນ ແຫ່ງນີ້ຄື :
1. ພຣະທາຕຸຫົວເນົ່າ ຄື ພຣະທາຕຸຫຼວງ ນະຄອນຫລວງວຽງຈັນ.
2. ອຸລັງຄະທາດ ຄືພຣະທາຕຸພຣະນົມ ນະຄອນພຣະນົມ .
3.ພຣະທາດແຂ້ວຝາງ 3 ອົງ ບັນຈຸໄວ້ທີ່ພຣະທາຕຸໂພນຈິກວຽງງົວ ໜອງຄາຍ .
4. ພຣະທາດແຂ້ວຝາງ 4 ອົງຄື ຢູ່ທີ່ພຣະທາຕຸຫໍ່ຜ້າ ຮ່ອງແພ ເຂດບ້ານຫ້ອມ ນະຄອນຫລວງວຽງຈັນ ນີ້ເອງ.
5.ພຣະທາຕຸ ພຣະບາດເບື້ອງຂວາ 9 ອົງ ມາປະດິດສະຖານໄວ້ທີ່ພຣະທາຕຸແຄມນ້ຳຂອງ ພຣະທາຕຸຫລ້າຫນອງ
ຫນອງຄາຍ(ປະຈຸບັນຈົມຢູ່ກາງນ້ຳຂອງ).
6.ພຣະທາດຫົວເນົ່າ ຈຳນວນ 29 ອົງ ມາປະດິດສະຖານໄວ້ທີ່ພຣະທາຕຸບັງພວນ ໜອງຄາຍ
ຕົກມາຮອດສະໄຫມ ພຣະເຈົ້າໂພທິສາຣະຣາຊ ເມື່ອ ພສ 2063-2093 ຫລື ຄສ 1520-1550 ໄດ້ມີພຣະຣາຊະສັດທາອັນແຮງກ້າຕໍ່ພຸທທະສາສາໜາ ຊົງມາບູຣະນະອູບມຸງ ຂອງພຣະທາຕຸແຂ້ວງຝາງ ທີ່ວັດຫໍ່ຜ້າ ຮ່ອງແພນີ້ ໂດຍມີການສ້າງພຣະທາຕຸບົວຫລ່ຽມ ຫຍໍ້ມູມ 20 ກໍ່ກວມອູບມຸງນ້ອຍ ຂຶ້ນ ຈາກນັ້ນກໍ່ມີການມາສ້າງພຣະພຸທທະຮູບນາຄປົກ ປູກຕົ້ນສຼີມະຫາໂພທິ໌ ປະຈຸບັນນີ້ພຣະທາຕຸທີ່ບັນຈຸພຣະທາຕຸແຂ້ວຝາງອົງທີ່ກ່າວເຖິງນີ້ ແມ່ນບໍ່ມີໃຫ້ເຫັນ ມີແຕ່ຖານຂອງພຣະທາຕຸນີ້ເທົ່ານັ້ນ ເມື່ອກ່ອນມີພຣະອາຈານທີ່ເພິ່ນມາຢູ່ວັດແຫ່ງນີ້ໃຫມ່ ເພິ່ນໄດ້ພາອ້າຍຈົວມາຖາກຖາງແລະຂຸດດິນຂ້າງພຣະທາຕຸອົງນີ້ ຈາກນັ້ນພຣະ ຈົວຫມົດວັດບໍ່ສະບາຍ ຈຶ່ງຕ້ອງມາຂໍຂະມາ ລາໂທດ ແລະສຶບປະຫວັດຄວາມເປັນມາຂອງພຣະທາຕຸດັ່ງກ່າວ ຈຶ່ງຮູ້ວ່າເປັນພຣະທາຕຸທີ່ສຳຄັນແລະສັກສິດຫລາຍ. ພຣະນາກປົກອົງນີ້ທາງຫລັງພຣະຈະມີຮູປະມານທໍ່ແຂນຄົນ ຮູດັ່ງກ່າວຊອດຮອດຫນອງຄຳແສນ ຊອດຮອດແຄມຂອງ ຊອດຮອດວັດນາກນ້ອຍ ແຖວຫລັກ 3 ແຖວສະຖານທຸດສິງກະໂປ ( ຂໍສັງເກດ ຮູບຮ່າງພຣະຍານາຄປົກພຣະພຸທທະຮູບອົງນີ້ ເປັນແບບລາວບູຮານໂດຍແທ້ຈິງ ກໍ່ຄື ມີຫອນທີ່ຕັ້ງໄປທາງຫນ້າ ເຊິ່ງນາຄປະຈຸບັນນີ້ຈະມີຫອນຊີ້ໄປດ້ານຫລັງເປັນສ່ວນຫລາຍ ເພາະຮູບນາຄທີ່ງົດງາມ ຫນ້າເກງຂາມ ໃນການຮັກສາພຸທທະສາສະນາແລະສົ່ງເສີມໃຫ້ພຸທທະສາສະໜາໃຫ້ຈະເຣິນຮຸ່ງເຮືອງໄປຫນ້າເລື້ອຍໆ ) ນ້ຳສ້າງຂອງວັດດັ່ງກ່າວນີ້ ແມ່ນມີມາເປັນຮ້ອຍໆ ປີມາແລ້ວ ບໍ່ເຄີຍບົກແຫ້ງຈັກເທື່ອ ມີປີຫນຶ່ງ ນ້ຳຂອງຫນອງຄຳແສນຂ້າງໆວັດບົກແຫ້ງ ຈະມີປາຈາກໜອງຄຳແສນມາອາໄສຢູ່ໃນນ້ຳສ້າງດັ່ງກ່າວນີ້ ພຣະທາຕຸແຂ້ວຝາງຂອງວັດຫໍ່ຜ້າ ຮ່ອງແພນີ້ ມີການບູຣະນະແຕ່ສະໄຫມພຣະເຈົ້າໂພທິສາຣະຣາຊ ເມື່ອ ພສ 2063-2093 ຫລື ຄສ 1520-1550 ພຸ້ນ ແລະດິນແຖວດິນເປັນດິນໃກ້ແຄມຂອງ ໃກ້ແຄມຫນອງຄຳແສນ ເປັນດິນອ່ອນ ເຮັດໃຫ້ພຣະທາຕຸຫລົ້ນລົງ ແລະບໍ່ໄດ້ມີການບູຣະນະນັບແຕ່ນັ້ນມາເລີຍ ຈົນກະທັງຕົກມາຮອດສະໄຫມຝຣັ່ງເສດເຂົ້າມາ ຈຶ່ງມີການມາບູຣະນະປະຕິສັງຂອນຄືນໃຫມ່
( ສະຫລຸບແລ້ວ ວັດແຫ່ງນີ້ຮ້າງມາໄລຍະຫນຶ່ງກ່ອນຝຣັ່ງເສດເຂົ້າມາປົກຄອງລາວເຮົາ ວັດແຫ່ງນີ້ : ມີຕົ້ນໂພ ມີນ້ຳສ້າງ ມີພຣະນາຄປົກ ແລະມີພຣະທາຕຸທີ່ເພພັງ ນີ້ເທົ່ານັ້ນ ທີ່ເປັນຫລັກຖານໃຫ້ມີການມາບູຣະນະຂຶ້ນເປັນວັດແຫ່ງນີ້ໃຫມ່ ດັ່ງທີ່ໄທເຮົາເຈົ້າຂ້ອຍເຫັນດັ່ງປະຈຸບັນນີ້ )
ຜູ້ໃດມີສັດທາອັນແຮງກ້າໃນການບູຣະນະ ພຣະທາຕຸແຫ່ງນີ້ ກໍ່ຂໍເຊີນຊວນຊ່ວຍກັນໃນການເຕົ້າໂຮມພະລັງຄວາມສາມັກຄີໃນການຮັກສາພຸທທະສາສະໜາ ແລະທີ່ສຳຄັນເປັນສະຖານທີ່ບັນຈຸແຂ້ວງຝາງຂອງພຣະສັມມາສັມພຸທທະເຈົ້າແລ້ວຍິງຈະຕ້ອງເອົາໃຈໃສ່ໃນການບູຣະນະໃຫ້ເປັນສຼີບ້ານສີເມືອງ ສຼີປະເທດເຮົາສຶບຕໍ່ໄປເນາະ ? ຂໍຂອບໃຈກັບພຣະອາຈາຣຍ໌ ມະຫາ ດຣ ບຸນທະວີ ວິໄລຈັກຣ໌ ທີ່ໃຫ້ຂໍ້ມູນເພື່ອໄປສຶບຄົ້ນແລະອະນຸລັກຮັກສາຕໍ່ໄປ ຂະນ້ອຍເດີ
ຜູ້ໃດມີສັດທາ ຮີບໂຮມກັນໃນການບູຣະນະພຣະທາຕຸອົງນີ້ຂຶ້ນໃຫມ່ ຄົງຈະເປັນສຣິມຸງຄົນແກ່ຕົນເອງ ຄອບຄົວ ປະເທດຊາດບ້ານເມືອງ ແລະທີ່ສຳຄັນເປັນການສຶບຕໍ່ພຸທທະສາສະໜາໃຫ້ຮູ່ງເຮືອງເຫລືອງເຫລືອມໄປນານເທົ່ານານ
ເຈົ້າອາວາດວັດນາຄ ຫໍຜ້າ ຮ່ອງແພ ພຣະອາຈາຣຍ໌ ຣັດຕະນະ ເບີໂທລະສັບຕິດຕໍ່ແມ່ນ : 020-5506562 ຕິດຕໍ່ໃນການບູຣະນະປະຕິສັງຂອນ ພຣະທາຕຸອົງນີ້ກັບເພິ່ນໄດ້ ເດີ.
ເສດຊາກຂອງທີ່ເພພັງ ທີເຊື່ອກັນວ່າແມ່ນພຣະທາຕຸແຂ້ວແຝງ ຂອງວັດນາຄ
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອະນຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
