ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ຮູ້ວ່າ: ສຳລັບກິດຈະກຳປີທ່ອງທ່ຽວທີ່ຈະມາເຖິງນີ້, ລວມມີທັງໝົດ 18 ກິດຈະກຳ ໃນຂອບເຂດທົ່ວປະເທດ ເຊັ່ນ:
ບຸນປີໃໝ່ຊົນເຜົ່າກຶມມຸ ແຂວງອຸດົມໄຊ, ງານບຸນເສົາຫລັກເມຶືອງ 10 ຊົນເຜົ່າແຂວງເຊກອງ, ບຸນພະບາດໂພນສັນ ແຂວງບໍລິຄຳໄຊ, ບຸນຊົນເຜົ່າ ແຂວງຫລວງນ້ຳທາ, ງານເທດສະການດອກງິ້ວບານ ແຂວງບໍ່ແກ້ວ, ບຸນຊ້າງ ແຂວງໄຊຍະບູລີ, ບຸນວັດພູ ແຂວງຈຳປາສັກ, ບຸນພະທາດສີໂຄດ ແຂວງຄຳມ່ວນ, ບຸນປີໃໝ່ລາວ ແຂວງຫລວງພະບາງ, ງານສະເຫລີມສະຫລອງແກ້ວຫລັກເມືອງ ແລະ ທ່ອງທ່ຽວຊົມຖ້ຳຜູ້ນຳ ແຂວງຫົວພັນ, ບຸນຊ່ວງເຮືອ ແຂວງສາລະວັນ, ບຸນນະມັດສະການພະທາດຫລວງ ນະຄອນຫລວງວຽງຈັນ, ບຸນຊ່ວງເຮືອເມືອງຂວາ ແຂວງຜົ້ງສາລີ, ບຸນພະທາດອີງຮັງ ແຂວງສະຫວັນນະເຂດ, ບຸນກິນຈຽງ (ຫລັກ 52) ແຂວງວຽງຈັນ, ບຸນກິນຈຽງ ແຂວງໄຊສົມບູນ ແລະ ງານນະມັດສະການພະເຈົ້າໄຊເສດຖາ ແຂວງອັດຕະປື.
 |
| ຮູບໂດຍ:anouphon phomhacsar |
ສຳລັບການເຄື່ອນໄຫວ ແລະ ກິດຈະກຳປິ່ນອ້ອມຢູພາຍໃນ ປະກອບມີ: ການຈັດຂະບວນຄາລາວານລົດທ່ອງທ່ຽວຕາມເສັ້ນທາງ ແຫລ່ງທ່ອງທ່ຽວ ບາງແຂວງພາກເໜືອ ແລະ ພາກໃຕ້, ການຈັດລາຍການຢ້ຽມຢາມແຫລ່ງທ່ອງທ່ຽວ ສຳລັບສື່ມວນຊົນ ແລະ ບໍລິສັດທ່ອງທ່ຽວພາຍໃນ ແລະ ຕ່າງປະເທດ ເພື່ອໂຄສະນາຜະລິດຕະພັນ ແລະ ແຫລ່ງທ່ອງທ່ຽວອັນໂດດເດັ່ນຂອງ ສປປ ລາວ, ໂດຍສະເພາະ ແມ່ນແຫລ່ງທ່ອງທ່ຽວປະຫວັດສາດ, ວັດທະນະທຳ ແລະ ທຳມະຊາດ, ກິດຈະກຳສະເຫລີມສະຫລອງວັນທ່ອງທ່ຽວໂລກ, ບຸນມະໂຫລານສິລະປະການສະແດງພື້ນເມືອງບັນດາເຜົ່າ ທົ່ວປະເທດໃນງານບຸນນະມັດສະການພະທາດຫລວງ.
 |
| ຮູບໂດຍ: noy images |
ນອກນີ້, ຍັງມີກິດຈະກຳທີຖືກສະເໜີເຂົ້າເພີ່ມ ມີ ພິທີຕັກບາດໃຫຍ່, ການເຕັ້ນລຳວົງ, ແລະ ເຕັ້ນບັດສະຫລົບ, ລາຍການທ່ອງທ່ຽວຂີ່ລົດຖີບອາຊຽນ, ການແຂ່ງລົດ ຈັກວິບາກ, ກິດຈະກຳປີນໜ້າຜາ ແລະ ກິດຈະກຳອື່ນໆ.
 |
| ຮູບໂດຍ:houmphet manisouk |
ສ່ວນລາຍການເຄື່ອນໄຫວ ແລະ ກິດຈະກຳປິ່ນອ້ອມຢູ່ຕ່າງປະເທດ ມີ ຈັດງານວັນລາວ (Lao night) ໃນງານ ATF 2018 ຢູ່ຊຽງໃໝ່ ປະເທດໄທ, ຈັດງານ Cooktail ຢູ່ ITB Berlin 2018 ປະເທດເຢຍລະມັນ, ງານວາງສະແດງທ່ອງທ່ຽວສາກົນ SMT ຢູ່ ປາຣີ ປະເທດຝຮັ່ງ, ຈັດງານວັນລາວ (Lao night) ທີ່ງານ Lao Festival ທີ່ໂຕກຽວ ປະເທດຢີປຸ່ນ, ຈັດງານວັນລາວ (Lao night) ໃນງານ ITE HCM ຢູ່ປະເທດຫວຽດນາມ, ງານວາງສະແດງທ່ອງທ່ຽວສາກົນ WTM ຢູ່ລອນດອນ ປະເທດອັງກິດ.
 |
| ຮູບໂດຍ:viengvatsana vongthongchith |
ໂດຍປຶກສາຫາລື ກັບກົມງົບປະມານ ແລະ ກົມຄັງເງິນ, ກະຊວງການເງິນ ກ່ຽວກັບແຜນງົບປະມານ ຮັບໃຊ້ໃຫ້ແກ່ປີທ່ອງທ່ຽວລາວ 2018 ທີ່ຈະມາເຖິງນີ້, ງົບປະມານທັງໝົດທີ່ຈະໃຊ້ມີເຖິງ 22.949.398.000 ກີບເພື່ອສຸມໃສ່ການຈັດຕັ້ງປະຕິບັດບັນດາກິດຈະກຳຕ່າງໆ ໃນການສະເຫລີມ ສະຫລອງປີທ່ອງທ່ຽວລາວ ໃຫ້ມີຂະບວນຟົດຟື້ນ ບັນລຸຕາມຈຸດປະສົງ ແລະ ລະດັບຄາດໝາຍ.
 |
| ຮູບໂດຍ:pong phoonsab tvs |
ແຫລ່ງທີ່ມາຈາກ ຂປລ
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
