ມາຮອດປັດຈຸບັນ ແຂວງບໍລິຄຳໄຊໄດ້ມີຄວາມພ້ອມໃນການຈັດກິດຈະກຳ ເພື່ອເປີດປີທ່ອງທ່ຽວລາວ-ທ່ອງທ່ຽວບໍລິຄຳໄຊ 2018 ທີ່ຈະມາເຖິງນີ້ ໃຫ້ເປັນຂະບວນຟົດຟື້ນ ແລະ ມີຄວາມໝາຍສຳຄັນອັນເລີກເຊີ່ງ.
ທ່ານ ເຄນ ລໍມະນີ ກຳມະການພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງບໍລິຄຳໄຊ ໄດ້ໃຫ້ສຳພາດຕໍ່ນັກຂ່າວ ໃນວັນທີ 15 ພະຈິກນີ້ວ່າ: ແຂວງບໍລິຄຳໄຊ ມີແຫຼ່ງທ່ອງທ່ຽວທັງໝົດ 104 ແຫ່ງໃນນັ້ນ ແຫຼ່ງທ່ອງທ່ຽວທາງປະຫວັດສາດ 3 ແຫ່ງ, ວັດທະນະທໍາ 12 ແຫ່ງ ແລະ ທໍາມະຊາດ 89 ແຫ່ງ, ມີໂຮງແຮມ-ເຮືອນພັກ130 ແຫ່ງ, 2.328 ຫ້ອງນອນ, ຮ້ານອາຫານ 154 ແຫ່ງ, ຮ້ານບັນເທີ່ງ 8 ແຫ່ງ, ຮ້ານຄາຣະໂອເກະ 7 ແຫ່ງ ແລະ ມີບໍລິສັດທ່ອງທ່ຽວ 4 ບໍລິສັດ ເຊີ່ງໄດ້ຜ່ານການຝຶກອົບຮົມ, ປັບປຸງການບໍລິການ ໃຫ້ຄວາມພ້ອມໃນການຮັບຮອງແຂກທັງພາຍໃນ ແລະ ຕ່າງປະເທດ.
ສຳລັບວຽກງານການກະກຽມເປີດປີທ່ອງທ່ຽວລາວ ພາຍຫລັງໄດ້ມີຂໍ້ຕົກລົງຂອງທ່ານນາຍົກ ເລກທີ 52/ນຍ, ລົງວັນທີ 4 ກໍລະກົດ 2017 ວ່າດ້ວຍການແຕ່ງຕັ້ງຄະນະຊີ້ນໍາລະດັບຊາດ ໃນການຈັດປີທ່ອງທ່ຽວລາວປີ 2018. ແຂວງບໍລິຄຳໄຊກໍໄດ້ອອກຂໍ້ຕົກລົງຂອງທ່ານເຈົ້າແຂວງ ສະບັບເລກທີ 832 ແລະ 833/ຂບຊ, ລົງວັນທີ 6 ພະຈິກ 2017 ວ່າດ້ວຍການແຕ່ງຕັ້ງຄະນະຊີ້ນໍາລະດັບແຂວງ, ອະນຸກໍາມະການຮັບຜິດຊອບ ໃນການຈັດປີທ່ອງທ່ຽວລາວປີ 2018 ທີ່ແຂວງບໍລິຄຳໄຊ.
ພ້ອມດຽວກັນກໍຍັງໄດ້ເປີດກອງປະຊຸມຄະນະຮັບຜິດຊອບຊີ້ນໍາລະດັບແຂວງ ໂດຍໄດ້ມີການຜ່ານແຜນດໍາເນີນງານກິດຈະກໍາປີທ່ອງທ່ຽວລາວລະດັບແຂວງ, ປີທ່ອງທ່ຽວລາວປີ 2018 ເຊີ່ງແຂວງບໍລິຄໍາໄຊ ໄດ້ກໍານົດເອົາງານບຸນນະມັດສະການພຣະທາດພຣະບາດໂພນສັນ ທີ່ຈະຂຶ້ນໃນວັນທີ 28 ທັນວາ 2017 ທີ່ຈະມາເຖີງນີ້ ເປັນພິທີເປີດປີທ່ອງທ່ຽວລາວ. ເຊີ່ງພາຍໃນງານຈະມີຫຼາກຫຼາຍກິດຈະກຳທີ່ໜ້າສົນໃຈ ເປັ້ນຕົ້ນແມ່ນງານຕະຫຼາດນັດ-ວາງສະແດງສິນຄ້າ ແລະ ຜະລິດຕະພັນການທ່ອງທຽ່ວ, ທຽ່ວຊົມງານວາງສະແດງ ແລະ ໄຫ້ວຮອຍພະບາດ, ສະແດງສີລະປະວັນນະຄະດີ ແລະ ກິດຈະກຳອື່ນໆອີກ.
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
