ພາທ່ຽວຫຼວງພະບາງ ຄວາມກົມກືນສວຍງາມຂອງສະຖາປັດຕະຍະກໍາ ກັບ ອານຸພົນ ພົມຮັກສາ

ຫຼວງພະບາງ ແມ່ນຫນຶ່ງໃນບັນດາເມືອງທີ່ເກົ່າແກ່ ຂອງ ສ.ປ.ປ.ລາວ ຊື່ງໄດ້ຮັບການ ສະຖາປະນາ, ປົກປັກຮັກສາ ແລະ ພັດທະນາ ມາໄດ້ຫຼາຍກວ່າ1.200 ປີ.

ຫຼວງພະບາງ ເປັນເມືອງຫຼວງຂອງ ອານາຈັກລາວ ລ້ານຊ້າງ ມາໄດ້ຫຼາຍຮ້ອຍປີ; ຕົວເມືອງແມ່ນ ມີຄວາມພິເສດ ຍ້ອນມີມໍລະດົກ ທາງດ້ານສະຖາປັດຕະຍະກໍາ ແລະສິລະປະກໍາອັນອຸດົມຮັ່ງມີ ຊື່ງສະທ້ອນ ໃຫ້ເຫັນ ຄວາມກົມກືນຂອງສະຖາປັດຕະຍະກໍາ ຜັງເມືອງ ແບບພື້ນເມືອງລາວ ກັບ ສະຖາປັດ ຕະຍະກໍາ ຜັງເມືອງຂອງຍຸກອານານິຄົມ.

ທິວທັດຂອງຕົວເມືອງທີ່ມີ ເອກະລັກສະເພາະ ໄດ້ຮັບການປົກປັກຮັກສາ ເປັນຢ່າງດີຊື່ງສະທ້ອນ ໃຫ້ເຫັນເຖິງ ການປະສົມປະສານກົມກຽວຂອງ ສອງປະເພນີວັດທະນະທໍາທີ່ແຕກຕ່າງກັນ.

ງານບຸນ ປະເພນີ, ພິທີກຳ ທາງສາດ ສະໜາ ແລະ ຂະນົບທຳນຽມອັນເກົ່າແກ່ຫລາຍສັດຕະວັດຍັງມີ ຊີວິດຊີວາ ແລະ ຕິດພັນກັບ ວິຖີຊີວິດ ຂອງປະ ຊາຊົນຊາວຫຼວງພະບາງ.

ຄໍາຂັວນຂອງແຂວງຫຼວງພະບາງ "ຫຼວງພະບາງເມືອງງາມ ອາຮາມຮຸ່ງເຮືອງ ງາມພູຕັ້ງຢູ່ກາງເມືອງ ເລືອງລືວັດທະນະທຳ ເມືອງນຸ່ງສິ້ນໄໝ ຂວັນໃຈນັກທ່ອງທ່ຽວ ເອາະຫຼາມໃສ່ສະຂ່ານ ງານຊ່ວງເຮືອເດືອນ 9 ເມືອງກ້ຽວຄຳຫວານ ຕຳນານເມືອງຂຳທຸ່ມ ວັດເກົ່າແກ່ມາກມີ ຕາດກວາງຊີ ແລະ ຖ້ຳຕີ່ງເປັນເມືອງມໍລະດົກໂລກ."

 +ສະຖາປັດຕະຍະກຳຂອງວັດວາອາຮາມ
ຕັ້ງແຕ່ໃດໆມາ ຈົນຮອດຕົ້ນສະຕະວັດທີ່ XXI ການກໍ່ສ້າງຕ່າງໆ ທີ່ຫລວງພະບາງ ແມ່ນເຮັດດ້ວຍໄມ້ທັງສີ້ນ, ນັບຕັ້ງແຕ່ ພະລາຊະວັງ ຕະຫລອດຮອດບ້ານເຮືອນ ຂອງເຈົ້າຂຸນມຸນນາຍ ຜູ້ສຳຄັນ. ສຳລັບປະຊາຊົນທົ່ວໄປແລ້ວ ສ່ວນຫລາຍ ແມ່ນເຮັດດ້ວຍໄມ້ໄຜ່. ມີພຽງແຕ່ ວັດວາອາຮາມເທົ່ານັ້ນ ທີ່ໄດ້ຮັບການກໍ່ສ້າງ ດ້ວຍດິນຈີ່ ເປັນແບບແຫນ້ນຫນາຖາວອນ.

       

   ເຖິງຢ່າງໃດກໍ່ຕາມ, ໃນຈຳນວນວັດວາອາຮາມ 65 ແຫ່ງ ທີ່ມີຢູ່ໃນສະຕະວັດທີ່ XVIII ນັ້ນ ໃນປັດຈຸບັນນີ້ ຍັງຄົງເຫລືອແຕ່ 29 ວັດ ຊຶ່ງໃນນັ້ນມີພຽງສາມວັດ ເທົ່ານັ້ນ ຄື: ວັດຊຽງທອງ, ວັດປາກຄານ ແລະ ວັດຄີລີ ທີ່ຍັງຮັກສາລັກສະນະໂຄງສ້າງ ແລະ ລວດລາຍປະດັບດັ່ງເດີມໄວ້ໄດ້. ກ່ອນອື່ນ ແມ່ນຍ້ອນພູມອາກາດເຂດຮ້ອນ ແລະ ພາຍຸຝົນ ທີ່ທຳລາຍໂຄງສ້າງ ແບບເບົາບາງເຫລົ່ານີ້ ຊື່ງວັດຖຸກໍ່ສ້າງຕົ້ນຕໍແມ່ນໄມ້. ຈາກນັ້ນ ແມ່ນອັກຄີໄພ ທີ່ເຜົາຜານຕົວເມືອງຫລາຍຄັ້ງ, ໂດຍສະເພາະແມ່ນ ຄັ້ງທີ່ເກີດຂື້ນໃນປີ 1774. ການກໍ່ສ້າງປົວແປງ ແລະ ບູລະນະຕົວເມືອງຄືນ ທີ່ດຳເນີນໄປໃນໄລະຍະສະໄຫມ ເປັນຫົວເມືອງຂື້ນຂອງຝລັ່ງ ກໍ່ຄື ໃນສະໄຫມຂອງ ອາເມລິກາຮຸກຮານ ສະແດງໃຫ້ເຫັນເຖິງການ ທຳລາຍ ມ້າງເພ ວັດວາອາຮາມ ເປັນຈຳນວນຫລວງຫລາຍ, ເພື່ອນຳໃຊ້ເປັນບ່ອນປຸກສ້າງ ອາຄານການປົກຄອງ, ຄ້າຍທະຫານ, ທີ່ພັກອາໄສ, ການຂະຫຍາຍເດີ່ນບີນ ແລະ ອື່ນໆ.

  ເຖິງຢ່າງໃດກໍ່ຕາມ, ຈາກບັນດາອາຄານ (ກຸຕິດ ຫໍໄຫວ້ທາດ) ສະຖານທີ່ ສັງຫາລິມະຊັບ ແລະ ພະພຸດທະຮູບ ທີ່ພວກເຮົາພົບເຫັນຢູ່ນຳວັດຕ່າງໆ ທີຫລົງເຫລືອມາເຖິງສະໄຫມ ປັດຈຸບັນນີ້, ພວກເຮົາມີຄວາມສາມາດ ກຳນົດໄດ້ເຖິງ ຄຸນລັກສະນະທົ່ວໄປ ຂອງສີລະປະ ຫລວງພະບາງ ແບບດັ່ງເດີມ ທີ່ເປັນເອກະລັກສະເພາະ ຂອງຕົນເອງ ໃນປະເພດທີ່ຢູ່ ໃນອາຊີຕາເວັນອອກສ່ຽງໃຕ້, ໂດຍທົ່ວໄປແລ້ວ ຢູ່ຫລວງພະບາງ ວັດວາອາຮາມແຕ່ລະແຫ່ງ ແມ່ນຖືກກຳນົດເຂດ ດ້ວຍກຳແພງອ້ອມຮອບ ທີ່ກໍ່ດ້ວຍດິນຈີ່. ປະຕູຂົງ ມີລັກສະນະເປັນຫໍຜາສາດ ປະເພດຫໍຈະຕຸລັດ ທີ່ມີຫລາຍຊັ້ນ ແລະ ມີຍອດປະດັບ, ວົງປະຕູທີ່ເປັນຮູບກົ່ງຄັນສອນ ມີຮູທະລຸລ່ວງເປັນທາງຜ່ານເຂົ້າໄປຫາສິມ ແລະ ໄປຫາພະພຸດທະສາດສະຫນາ ສະຖານອື່ນໆໃນວັດ.

ຮູບໂດຍ: Anouphon Phomhacsar
ຮຽບຮຽງຈາກhttp://www.luangprabang-heritage.org
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com