ໃນຕອນເຊົ້າວັນທີ17 ກຸມພາ ແຂວງໄຊຍະບູລີ ໄດ້ເປີດງານບຸນຊ້າງ ແລະ ເປີດທ່ອງທ່ຽວລາວຢ່າງເປັນທາງການ. ໂດຍມີຊ້າງເຂົ້າຮ່ວມ 69 ໂຕ ແລະ ຈະມີ30ກິດຈະກຳທີ່ພົວພັນກັບຊ້າງເປັນຕົ້ນ:ການສະແດງຂອງຊ້າງຄໍາຮູ້,ການບາສີໃຫ້ຊ້າງ,ການທຳບຸນໃສ່ບາດອຸທິດສ່ວນບຸນກຸສົນໃຫ້ຊ້າງທີ່ຕາຍໄປ,ຊ້າງຟ້ອນລຳວົງ,ຊ້າງແຕ້ມຮູບ ແລະ ອື່ນໆ...
ສ່ວນໃນວັນທີ 16 ກຸມພາຜ່ານມາ ກໍໄດ້ເປີດງານ ຕະຫລາດວາງສະເເດງຂາຍສິນຄ້າ ກະສິກຳ ແລະ ຫັດຖະກຳ ຕິດພັນກັບງານ ມະຫາກຳບຸນຊ້າງ ແລະ ປີທ່ອງທ່ຽວ ໃນລະຫວ່າງ 16-22 ກຸມພາ 2018 ທີ່ເດີ່ນສະໜາມຫລວງ ແຂວງ ໄຊຍະບູລີ.
ອີງຕາມການລາຍງານຂອງໜັງສືພິມເສດຖະກິດ ການຄ້າ ໃຫ້ຮູ້ວ່າ: ບຸນຊ້າງ ແມ່ນງານບຸນປະເພນີທີ່ຕິດພັນກັບການສົ່ງເສີມການທ່ອງທ່ຽວ ທັງເປັນການອະນຸລັກຮີດຄອງປະເພນີອັນດີງາມທີ່ເປັນເອກະລັກຂອງທ້ອງຖິ່ນ. ງານດັ່ງກ່າວໄດ້ເລີ່ມຈັດຂຶ້ນມາຕັ້ງແຕ່ປີ 2007 ທີ່ບ້ານວຽງແກ້ວ ເມືອງຫົງສາ ແລະ ສືບຕໍ່ຈັດຂຶ້ນໃນແຕ່ລະປີ ໂດຍໄດ້ຮັບການຮ່ວມມືຈາກສູນອະນຸລັກຊ້າງອາຊີ ເຊິ່ງເບື້ອງຕົ້ນການຈັດງານຈະຢູ່ໃນລະດັບຂັ້ນບ້ານ, ຫຼັງຈາກນັ້ນກໍໄດ້ຍົກລະດັບການຈັດງານຂຶ້ນຢູ່ໃນຂັ້ນເມືອງ ມີ 3 ເມືອງໄດ້ຜັດປ່ຽນກັນເປັນເຈົ້າພາບຄື: ເມືອງຫົງສາ, ເມືອງປາກລາຍ ແລະ ເມືອງໄຊຍະບູລີ ໝູນວຽນກັນໄປຕາມເງື່ອນໄຂທີ່ສາມາດເອື້ອອຳນວຍໃຫ້ກັບການຈັດງານໃນແຕ່ລະບ່ອນ. ໄລຍະຕໍ່ມາເພື່ອເປັນການຍົກລະດັບການຈັດງານໃຫ້ຢູ່ໃນລະດັບຂັ້ນແຂວງຈຶ່ງຍ້າຍການຈັດງານມະຫາກຳບຸນຊ້າງມາຢູ່ທີ່ເມືອງໄຊຍະບູລີ ແບບຖາວອນໂດຍເລີ່ມມາຕັ້ງແຕ່ປີ 2012 ເປັນຕົ້ນມາ.
ການທີ່ເລືອກແຂວງໄຊຍະບູລີເປັນບ່ອນຈັດມະຫາກຳບຸນຊ້າງ ກໍເນື່ອງຈາກວ່າ ແຂວງດັ່ງກ່າວມີຊ້າງອາໄສຢູ່ຫຼາຍກວ່າໝູ່ໃນປະເທດລາວ ເຊິ່ງມີປະຊາກອນຊ້າງທັງໝົດ 500 ກວ່າໂຕ (ລວມທັງຊ້າງລ້ຽງ ແລະ ຊ້າງປ່າ) ຈາກເຫດຜົນດັ່ງກ່າວອຳນາດການປົກຄອງແຂວງຮ່ວມກັບອົງການອະນຸລັກຊ້າງອາຊີ ຈຶ່ງໄດ້ຈັດໃຫ້ມີງານບຸນຊ້າງຂຶ້ນໃນແຕ່ລະປີ.
ງານບຸນຊ້າງປິ 2017 ຈັດຂຶ້ນລະຫວ່າງ ວັນທີ 19-21 ກຸມພາ ມີຈໍານວນຊ້າງ 68 ໂຕ ສາມາດດຶງດູດນັກທ່ອງທ່ຽວໄດ້ 130,000 ຄົນ ແລະ ຄາດວ່າການຈັດງານບຸນຊ້າງໃນປີ 2018 ນີ້ຈະສາມາດດຶງດູດນັກທ່ອງທ່ຽວໄດ້ເຖິງ 150,000 ຄົນ.
ຮູບໂດຍ: Houmphet Manisouk
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
