ມື້ກ່ອນໄດ້ຂຽນເຖິງ ທີມງານ2 ລໍ້ວິຖີຊິວິດລາວ ເດີນທາງຈາກນະຄອນຫຼວງວຽງຈັນ ສູ່ຮາໂນ້ຍ ດ້ວຍລົດຈັກ ລວມໄລຍະທາງກວ່າ3000ກິໂລແມັດ.
ມື້ນີ້ ຈະມາກ່າວເຖິງລາຍລະອຽດຫຍໍ້ໆຂອງການເດີນທາງໃນແຕ່ລະມື້
 |
| ທິວທັດ ນາຂັ້ນໄດຢູ່ເມືອງຊາປາ |
+ ມື້ທີ 1 (16 ມິຖຸນາ 2017)
ພວກເຮົານັດລວມໂຕກັບຢູ່ທາດຫຼວງ ຕອນ 5ໂມງເຊົ້າ ເພື່ອກາບເຈົ້າໄຊເສດຖາ ຂໍພອນກ່ອນອອກເດີນທາງ
ການເດິນທາງໃນມື້ທຳອິດ ກໍຖືວ່າຫຍຸ້ງຍາກສົມຄວນ ເມື່ອລົດຈັກຄັນຫນຶ່ງມີອາການບໍ່ຄ່ອນດີແຕ່ເຊົ້າຈຳຕ້ອງປ່ຽນລົດຄັນໃຫມ່ ແລະອີກຄັນ ຕ້ອງໄດ້ປ່ຽນຢາງ ເຮັດໃຫ້ກວ່າຈະອອກຈາກຕົວເມືອງກໍ 7 ໂມງກວ່າໆແລ້ວ.
 |
| ຍາມຄໍ່າຢູ່ຕະຫຼາດມືດ ຫຼວງພະບາງ |
ຈຸດໝາຍມື້ທີໜຶ່ງແມ່ນໄປພັກທີ່ຫຼວງພະບາງ ລວມໄລຍະທາງ300ກວ່າກິໂລແມັດ ປະມານ 5 ໂມງແລງ ພວກເຮົາກໍຮອດຫຼວງພະບາງ ຈາກນັ້ນກໍຊອກທີ່ພັກໃນລາຄາທີ່ພໍດີ(100,000ກີບຕໍ່ຄືນ) ແລ້ວກໍພັກຜ່ອນຖ່າຍຮູບຕາມອັດທະຍາໄສ ສ່ວນຂ້ອຍເລືອກຖ່າຍຮູບວັດວາອາຮາມໃນຕົວເມືອງ.
+ມື້ທີ 2 ( 17 ມິຖຸນາ 2017 )
 |
| ພູທາດ ອຸດົມໄຊ |
ເປົ້າໝາຍແມ່ນອຸດົມໄຊ ໄລຍະທາງເກືອບ200ກິໂລແມັດ ແຕ່ກວ່າຈະອອກຈາກຫຼວງພະບາງກໍເກືອບ 1 ໂມງ ເມື່ອລົດຄັນຫນຶ່ງ ຕ້ອງໄດ້ເຂົ້າແປງດ່ວນ.
ພວກເຮົາຂັບລົດໄປເລື້ອຍໆເນື່ອງຈາກເສັ້ນທາງນີ້ມາຫຼາຍຄັ້ງແລ້ວຈິ່ງບໍ່ໄດ້ຈອດແວ່ຖ່າຍຮູບ ເລີຍ. ປະມານ5:30ໂມງ ກໍຮອດ ເນື່ອງຈາກແສງກຳລັງງາມກໍພາກັນມຸ່ງສູ່ພູທາດເພື່ອຖ່າຍຮູບຕາມວິຊາໃຜລາວ ຈາກນັ້ນຈັງມາຊອກ ທີ່ພັກ.
+ມື້ທີ 3 ( 18 ມິຖຸນາ 2017 )
 |
| ທິວທັດຕາມເສັ້ນທາງ ກ່ອນຈະຮອດເມືອງໃຫມ່ ແຂວງຜົ້ງສາລີ |
ເປັນໄລຍະທາງທີ່ສັ້ນປະມານ 140 ກິໂລແມັດ ແຕ່ເປັນເສັ້ນທາງທີ່ຫນ້າສົນໃຈ ຫຼາຍໂດຍສະເພາະ 3ແຍກປາກນໍ້ານ້ອຍ ຈະມີຊົນເຜົ່າມາຂາຍເຄື່ອງຕ່າງໆຕາມລະດູການ.
ຂະນະທີ່ເສັ້ນທາງແຕ່ປາກນໍ້ານ້ອຍຫາເມືອງໃຫມ່ກໍສ້າງຄວາມຕື່ນເຕັ້ນໃຫ້ແກ່ທີມງານຂອງພວກເຮົາ ເນື່ອງຈາກເສັ້ນທາງນີ້ ຍັງບໍ່ເຄີຍມາຈັກເທື່ອ ຕະຫລອດສາຍທາງພວກເຮົາຈະຈອດລົດ ເພື່ອ ຖ່າຍຮູບເປັນຈຸດໆ ຈົນເກືອບ6 ໂມງ ຈັງມາຮອດ ເມືອງໃຫມ່ ແຂວງຜົ້ງສາລີ ເຊິ່ງເປັນເມືອງນ້ອຍໆຕັ້ງຢູ່ຮ່ອມພູ.
ມື້ທີ 4 (19 ມິຖຸນາ 2017 )
 |
| ຕະຫຼາດຍາມເຊົ້າຢູ່ເມືອງໃຫມ່ ແຂວງຜົ້ງສາລີ |
ເປັນມື້ທີ່ທ້າທາຍທີ່ສຸດຂອງການເດີນທາງກໍວ່າໄດ້ ເພາະຈະເປັນການຂີ່ລົດແບບມາລາທອນ ລວມໄລຍະທາງປະມານ 400 ກິໂລແມັດ ໂດຍມີເປົ້າຫມາຍທີ່ ເມືອງຊາປາ ແຂວງລາວກາຍ ທາງພາກເຫນືອຂອງຫວຽດນາມ.
ພວກເຮົາອອກລົດຈາກເມືອງໃຫມ່ແຕ່ເຊົ້າ ໄປຫາຊາຍແດນປະມານ30ກິໂລແມັດ ແລະຄໍາຕອບທີ່ໄດ້ຮັບຈາກເຈົ້າຫນ້າທີ ຕມ ລາວ ກໍຄືຂີ່ລົດຈັກຂ້າມໄປຫວຽດນາມສະດວກສະບາຍ ທີ່ຜ່ານມາກໍມີຢ່າງຫຼວງຫລາຍ ລວມເຖິງຄົນຕ່າງໆປະເທດຜ່ານດ່ານນີ້ຫລາຍສົມຄວນ.
ມີກວດກາເອກະສານຢູ່ດ່ານລ່ວແລເວ ກໍຕີ່ລົດໄປຕື່ມປະມານ10 ກິລໂແມັດ ຈັງຮອດດ່ານເບື້ອງຫວຽດນາມ ຈາກນັ້ນກໍແຈ້ງເອກະສານ ແລະ ຈ່າຍຄ່າທໍານຽມ(ຄ່າທໍານຽມຄົນເຂົ້າເມືອງ 20ພັນດົງ ແລະຄ່າທໍານຽມເອົາລົດຈັກເຂົ້າໄປຫວຽດນາມອີກ 30 ພັນດົງ) ກໍເປັນອັນສຳເລັດ.
 |
| ເສັ້ນທາງກ່ອນທີ່ຈະເຈົ້າສູ່ເທດສະບານແຂວງດຽນບຽນຟູ້ |
ຕະຫຼອດເສັ້ນທາງເຕັມໄປດ້ວຍຄວາມຕື່ນເຕັ້ນ ທີ່ເຫັນຄວາມງາມຂອງທຳມະຊາດ, ວັດທະນະທຳ ໂດຍສະເພາະວິຖິຊີວິດຊອງປະຊາຊົນ ທີ່ຍັງຄົງຄວາມເປັນເອກະລັກໄວ້ໄດ້ດີ ທັງທີ່ແຂວງດຽນບຽນຟູ້, ແຂວງລາຍເຈົາ.
 |
| ຕາມເສັ້ນທາງກ່ອນຈະຮອດຊາປາ ຫວຽດນາມ |
ແຕ່ກ່ອນຈະຮອດ ເມືອງຊາປາປະມານ 30 ກິໂລແມັດກໍມີຝົນຕົກ ນໍ້າໝອກລົງຈົນເຮັດໃຫ້ການເບິ່ງເຫັນ ຫຍຸ້ງຍາກ ພວກເຮົາຄ່ອຍໆຂິ່ລົດໄຕມາດສັນພູ ອາກາດກໍໜາວເຢັນຊັກໃຊ້ ໃນໃຈກໍຄອງຄອຍຫຼຽວ ເບິ່ງແຕ່ຫລັກກິໂລແມັດວ່າປານໃດຈະຮອດຊາປາ ຈົນໃນທີ່ສຸດກໍມາຮອດໃນເວລາ 9 ໂມງກາງຄືນ.
ມື້ທີ 5 (20 ມິຖຸນາ 2017 )
 |
| ທິວທັດນາຂັ້ນໄດ ເມືອງປາຊາ ແຂວງລາວກາຍ ຫວຽດນາມ |
ຮອດເວລາ11ໂມງແລ້ວຝົນທີ່ຕົກລົງມາແຕ່ຄືນນີ້ກໍບໍ່ມີທີ່ທ່າວ່າຈະເຊົາ ຂ້ອຍກັບໂນ່ປຶກສາກັນແລ້ວຕັດສິນໃຈເລາະຖ່າຍຮູບທ່າມກາງສາຍຝົນ ໄດ້ຈັກຮູບສອງຮູບກໍດີກວ່າບໍ່ໄດ້ຮູບເລີຍ, ໃນໃຈກໍຄິດວ່າຟ້າເອີຍຟ້າ ເຈົ້າຊ່າງມາໃຈຮ້າຍໃຈດຳນໍ ອຸດສາດັ້ນດົ້ນເດີນທາງມາໄກ ບໍ່ເຫັນໃຈກັນນໍ ຊິປັກຫົວສີໄຄ ກໍບໍ່ທັນການແລ້ວ.
ຈົນຮອດປະມານເກືອບບ່າຍສອງໂມງ ສາຍຝົນຈິ່ງຈ່າງລົງ ເຮັດໃຫ້ການເລາະຖ່າຍຮູບສະດວກຂຶ້ນແດ່ ແຕ່ທ້ອງຟ້າກໍຍັງມືດຄຶ້ມຢູ່; ສ່ວນແສງບໍ່ຕ້ອງຖາມຫາໝົດໂອກາດເລັດລອດອອກມາ. ແຕ່ພວກເຮົາກໍຂີ່ລົດເລາະຖ່າຍຮູບໄປເລື້ອຍຈົນຄໍ່າຈັງກັບທີ່ພັກ.
 |
| ຊາວນາ ກຳລັງໄຖນາ |
ເກືອບລື່ມຕອນສຳຄັນ… ທີ່ຢູ່ຮ້ານອາຫານ Haven ເຊິ່ງເປັນຈຸດຊົມວິວ ແລະ ມູມຖ່າຍ ຮູບທີ່ງົດງາມ ແຫ່ງຫນຶ່ງ ພວກເຮົາກໍໄດ້ພົບ ກັບນັກສຶກສາສາວຫວຽດນນາມທີ່ມາທ່ຽວ(4 ຄົນຄືກັນ) ກໍເລີຍຖ່າຍຮູບຮ່ວມເປັນທີ່ລະນຶກ(ສ່ວນເລື່ອງລາວຕໍ່ໄປຈະເກີດຫຍັງຂຶ້ນ ຈະໄດ້ເລົ່າໃນມື້ທີ່9 ຂອງການ ເດີນທາງ).
ອາບນໍ້າແຕ່ງຕົວແລ້ວກໍຍ່າງເລາະຊົມເມືອງຍາມຄໍ່າ, ຈາກນັ້ນກໍຫາບ່ອນກິນເຂົ້າໃນລາຄາ ປະຢັດຖົງ(ເຂົ້າລາດຫນ້າ 60ພັນດົງ ຫລືປະມານ 22ພັນກີບ) ອັດຕາແລກປ່ຽນຕອນນັ້ນແມ່ນ 10ພັນກີບ ຕໍ່27.000 ດົງ).
 |
| ຕົວເມືອງຊາປາໃນຍາມຄໍ່າ |
ສ່ວນທີ່ພັກຢູ່ເມືອງຊາປາ ນັ້ນພວກເຮົາກໍເລືອກທີ່ບໍ່ແພງ ແຕ່ໂດຍລວມກໍຖືກວ່າໂອເຄ ຫ້ອງ ພັກສະອາດ,ໃຫຍ່ແຖມມີອາຫານເຊົ້າພ້ອມໃນລາຄາຄືນລະ200.000ດົງ ຫລື ປະມານ 74.000ກີບ (ນອນສອງຄົນ ສອງຄືນກໍຖືກຜູ້ລະ 200.000ດົງ).
 |
| ອີກມູມຂອງນາຂັ້ນໄດ ເມືອງປາຊາ |
ສຳລັບມື້ນີ້ ຢຸດໄວ້ທໍ່ນີ້ກ່ອນ, ມື້ຕໍ່ໄປຈະມາເລົ່າເຖິງມື້ທີ 6 ຫາ12 ໂດຍສະເພາະມື້ທີ6 ເປັນມື້ທີ່ໃຊ້ເວລາໃນການເດີນທາງດົນນານທີ່ສຸດ ເຖິງ 16 ຊົ່ວໂມງ ຢໍ້າ 16 ຊົ່ວໂມງ ຈັງເຖິງເປົ້າໝາຍ! ເກີດຫຍັງຂຶ້ນຈັງເປັນແບບນັ້ນ…ຢ່າລື່ມຕິດຕາມອ່ານໃນຕອນຕໍ່ໄປ
ຂອບໃຈທີ່ຕິດຕາມອ່ານຈົນຈົບນໍ
ສະບາຍດີ…ບາຍບາຍ
 |
| ຊາວນາເມືອງຊາປາ ພວມແຂງຂັນ ເຮັດນາຂັ້ນໄດ |
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
