ເຈົ້າຄວນໄປນອນ ບ້ານກອງລໍ (ຖໍ້າກອງລໍ) ຈັກຄັ້ງໃນຊີວິດ

ສະບາຍດີຕອນເຊົ້າວັນຈັນ ທ່າມກາງສະພາບອາກາດທີ່ຫນາວເຢັນ  ແອັດມິນ ຂໍນຳເອົາບົດຄວາມແລະພາບສະຖານທີ່ທ່ອງທ່ຽວບ້ານກອງລໍ(ຖໍ້າກອງລໍ ເມືອງຄູນຄຳ ແຂວງຄຳມ່ວນ)  ຈາກ ເຟຈ Alaotheworld ມານຳສະເຫນີ.

 ບ້ານກອງລໍເປັນທີ່ຕັ້ງຂອງ "ຖໍ້າກອງລໍ" ທີ່ຫຼາຍຄົນຮູ້ຈັກກັນດີແລະອາດເຄີຍໄປມາແລ້ວແຕ່ຂ້ອຍເຊື່ອວ່າຍັງມີຫຼາຍຄົນທີ່ໄປແລ້ວບໍ່ໄດ້ຄ້າງຄືນ ຫຼື ຄ້າງຄືນແຕ່ຕື່ນສວຍ ກະເລີຍພາດໂອກາດທີ່ຈະເຫັນສິ່ງທີ່ຫຼາຍຄົນບໍ່ເຄີຍເຫັນ ບໍ່ເຄີຍສຳຜັດ ເພາະມັນມີຢູ່ທີ່ນີ້ແຫ່ງດຽວ ນັ້ນກໍ່ຄື ບັນຍາກາດຍາມເຊົ້າ ແລະ ວິຖີຊີວິດຂອງຄົນທ້ອງຖິ່ນ ທີ່ມີຄວາມງົດງາມເປັນເອກະລັກ ແລະ ໃຫ້ຄວາມຮູ້ສຶກທີ່ຕ່າງຈາກຫຼາຍໆບ່ອນໃນລາວ ແລະ ໃນໂລກ.

ການຄູນດິນຂອງຊາວສວນ ເມື່ອມີແສງແດດຍາມເຊົ່າກະທົບໃສ່ ກໍ່ໃຫ້ເກີດເປັນຮູບຮ່າງລວດລາຍທີ່ງົດງາມ

ດັ່ງນັ້ນເຮົາຄວນຈະສົ່ງຕໍ່ ແລະ ເຜີຍແພ່ຄວາມມະຫັດສະຈັນເລົ່ານີ້ໃຫ້ອ້າຍນ້ອງຄົນລາວດ້ວຍກັນ ແລະ ລວມໄປເຖິງຄົນທົ່ວໂລກໃຫ້ໄດ້ຮັບຮູ້

ຄໍາເຕືອນ:

1.ສະຖານທີ່ແຫ່ງນີ້ຕັ້ງຢູ່ຫ່າງຈາກຕົວເມືອງຄຸນຄຳປະມານ ​40 ກວ່າກິໂລ, ຈຶ່ງສົ່ງຜົນໃຫ້ຮ້ານອາຮານຢູ່ບໍລິເວນນີ້ (ມີ 2-3 ຮ້ານ) ລາຄາຂ້ອນຂ້າງແພງ ແລະ ອາດຈະບໍ່ຫຼາກຫຼາຍ ດັ່ງນັ້ນຖ້າໃຜມີແຜນທີ່ຈະໄປຄ້າງຄືນ ຖ້າສະດວກຊອກແນວໄປເຮັດກິນເອົາເອງກະດີ

ແສງແດດສີທອງຍາມເຊົ້າສາດຊ່ອງກະທົບຍອດຜາຫີນ ແລະ ຍອດຕົ້ນໄມ້ໃບຫຍ້າ ພ້ອມດ້ວຍອາຍໝອກຈາງໆ 

2. ຢູ່ບໍລິເວນນີ້ມີເຮືອນພັກຢູ່ຈຳນວນໜຶ່ງ ຖ້າເປັນຊ່ວງລະດູທ່ອງທ່ຽວ (ຊ່ວງຍາມໜາວ) ສ່ວນຫຼາຍມັກຈະເຕັມ ,ດັ່ງນັ້ນຖ້າຈອງກ່ອນໄດ້ຈະເປັນການດີ ແຕ່ຖ້າບໍ່ສະດວກໄປລຸ້ນເອົາກະມ່ວນດີ

ແນະນຳໃຫ້ພັກຢູ່ບໍລິເວນໃກ້ແຖວທາງເຂົ້າຖໍ້າ ເພາະຮ້ານຂາຍເຄື່ອງ, ຮ້ານ ອາຫານ ຈະມີແຕ່ຢູ່ແຖວນັ້ນ

ຄົນສວນກຳລັງກົ້ມໜ້າກົ້ມຕາເຮັດວຽກຢ່າງຕັ້ງໃຈ ໃນຍາມເຊົ້າ ເມື່ອແສງແດດຊ່ອງລົງມາກະທົບກັບອາຍໝອກຍາມເຊົ້າເຮັດໃຫ້ເກີດເປັນລວດລາຍທີ່ສວຍສົດງົດງາມ

ຖ້າໃຜບໍ່ຮູ້ຊິເລືອກບ່ອນໃດດີ ຂ້ອຍແນະນຳ "ເຮືອນພັກ ຄູນມີ" ຂ້ອຍກັບໝູ່ໄປພັກມາແລ້ວ ສະອາດ, ໃໝ່, ວິວດີ, ສະດວກ, ຢູ່ໃກ້ຮ້ານອາຫານ

3.ສະຖານທີ່ນີ້ ແລະ ບໍລິເວນໃກ້ຄຽງຈະບໍ່ມີສິ່ງອຳນວຍຄວາມສະດວກຫຼາຍ ແລະ ບໍ່ມີສະຖານທີ່ໃຫ້ທ່ຽວກາງຄືນ

ສະຖານທີ່ນີ້ເປັນບ້ານນ້ອຍໆຢູ່ໃນທົ່ງກວ້າງ ທີ່ອ້ອມຮອບດ້ວຍຜາຫີນ ອາກາດຊ່ວງເຊົ້າ ແລະ ຕອນຄໍ່າກຳລັງດີ ແຕ່ຕອນບ່າຍ ຢາກວ່າຮ້ອນໜ້ອຍໜຶ່ງຫາປານກາງ

4. ຢູ່ຫວ່າງທາງກ່ອນຈະມາຮອດ ຈະມີຫຼາຍສິ່ງຫຼາຍຢ່າງທີ່ໜ້າປະທັບໃຈ ແລະ ເຮັດໃຫ້ຕ້ອງຈອດລົດຖ່າຍຮູບ ດັ່ງນັ້ນຂ້ອຍແນະນຳໃຫ້ອອກເດີນທາງມາແຕ່ເຊົ່າເພື່ອເວລາຈອດຖ່າຍຮູບ

5. ກ່ອນຊິຮອດບ້ານກອງລໍ ຫຼື ຖໍ້າກອງລໍປະມານ 40 ກ່ວາກິໂລ ຈະເປັນທີ່ຕັ້ງຂອງຜາຫີນອັນງົດງາມກະຢ່າລືມແວ່ຖ່າຍຮູບ (ມີປ້າຍບອກຄືຢູ່ໃນຮູບ)

6. ການເດີນທາງ ມີສອງວິທີຄື: ໄປດ້ວຍລົດໂດຍສານປະຈຳທາງ ແລະ ໄປດ້ວຍລົດສ່ວນຕົວ

+ລົດໂດຍສານປະຈຳທາງ: ມີລົດປະຈຳທາງແຕ່ນະຄອນຫຼວງຫາບ້ານກອງລໍ ລົດອອກປະມານ 6:45 ຕອນເຊົ້າ ຂຶ້ນຢູ່ຄິວລົດສາຍໃຕ້ (ຖ້າຂໍ້ມູນຜິດພາດຕ້ອງຂໍໂທດຫຼາຍ ເພາະຂ້ອຍກະຍັງບໍ່ເຄີຍໃຊ້ບໍລິການ)

ອ້າງອີງ:https://www.tripadvisor.com/ShowTopic-g293949-i9320-k776905…

+ລົດສ່ວນໂຕ: ອາດຈະເປັນລົດໃຫຍ່, ລົດຈັກ, ລົດຖີບ, ແລ່ນ ຫຼື ຍ່າງໄປກະໄດ້ຖ້າສະດວກ. ແຕ່ຂ້ອຍເຫັນຝຣັ່ງຂີ່ລົດຈັກໄປຫຼາຍ. ສຳລັບຄົນທີ່ເລີ່ມຈາກນະຄອນຫຼວງ ຫຼື ມາແຕ່ເໜືອ ກະຂັບໄປຕາມທາງ 13 ໃຕ້ເລີຍ ໄປຈົນຮອດທາງແບ່ງຫຼັກ 20 ແຂວງບໍລິຄາໄຊ ແລະ ລ້ຽວຊ້າຍ ເຂົ້າໄປຕາມທາງເລກ 8 ທີ່ເປັນທາງໄປຫາຊາຍແດນລາວຫວຽດ.

ຫລັງຈາກລ້ຽວຊ້າຍເຂົ້າມາໄດ້ປະມານ 40 ກິໂລເຈົ້າກໍ່ຈະມາຮອດ ປ່າຜາຫີນ.

ໃຫ້ຂັບຕາມພູຕາມຜາມາເລີ່ອຍໆຈົນລົງມາພື້ນຮາບພຽງແລ້ວຈະເຫັນປໍ້ານໍ້າມັນຢູ່ຂວາມື ຂີ່ຕໍ່ມາໜ້ອຍໜຶ່ງຈະຮອດທາງແຍກ(ມີຕະຫຼາດຢູ່ໂຕແຍກ) ແລ້ວໃຫ້ລ້ຽວຂວາ (ໜ້າຈະມີປ້າຍບອກໄປຖໍ້າກອງລໍ)

ຫຼັງຈາກນັ້ນຂີ່ມາເລີ່ຍໆປະມານ 30 - 40 ກິໂລກະຖືວ່າຮອດບ້ານກອງລໍຢ່າງເປັນທາງການ.

 ສຸດທ້າຍນີ້ ກະຂໍອວຍພອນໃຫ້ທຸກຄົນເດີນທາງດ້ວຍຄວາມປອດໄພ ມ່ວນໆກັບການທ່ອງທ່ຽວ ແລະ ມີຄວາມສຸກກັບການໃຊ້ຊີວິດຫຼາຍໆ ຢາກເຮັດຫຍັງກະຂ້ຽວເຮັດ ເພາະຊີວິດມັນສັ້ນ ດ້ວຍຄວາມປາຖະໜາດີຈາກ ຄົນລາວຄົນໜຶ່ງທີ່ມັກຖ່າຍຮູບທົວທັດ ແລະ ມັກທ່ອງທ່ຽວ ແຕ່ບໍ່ມີເງິນ.

ທ່ານສາມາດຕິດຕາມຜົນງານອື່ນຂອງຊ່າງພາບຍຜູ້ນີ້ໄດ້ທີ່ແຟນເຟຈAlaotheworld
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com