ແຂວງ ຄຳມ່ວນເປັນດິນແດນອຸດົມຮັ່ງມີໄປດ້ວຍພະຍາກອນທາງທຳມະຊາດ, ໃນນໍ້າມີປາໃນນາມີເຂົ້າ, ມີປ່າດົງກວ້າງໃຫຍ່ຕຶບໜາ, ມີ ພູຜາສູງຊັນ, ມີຖໍ້າຫ້ວຍນໍ້າລໍາເຊຫລາຍສາຍ, ປະຊາຊົນດຳລົງຊີວິດພາຍໃຕ້ຄວາມສາມັກຄີປອງດອງໃນວົງຄະນາຍາດ ແຫ່ງຊາດ ລາວ.
ແຂວງຄຳມ່ວນມີຄະນົບທຳນຽມຮີດຄອງປະເພນີອັນດີງາມ, ປະຊາ ຊົນຊາວແຂວງຄຳມ່ວນ ເປັນຄົນທີ່ມີຈິດໃຈໂອບເອື້ອເພື່ອແຜ່, ຮັກແພງແຂກຕ່າງດ້າວ-ທ້າວຕ່າງແດນ, ແຂວງຄຳມ່ວນ ເປັນ ດິນແດນທີ່ມີແຕ່ສັນຕິສຸກ, ມີແຫລ່ງທ່ອງທ່ຽວທີ່ເລື່ອງລືທົ່ວໂລກເປັນຕົ້ນແມ່ນ: ຖໍ້າມະຫັດສະຈັນກອງລໍ-ນາຕານ, ຖໍ້ານໍ້າ ລອດເຊບັ້ງໄຟ, ຖໍ້ານາງແອ່ນ, ຂຸນກອງແລງ, ນໍ້າຕົກຕາດນໍ້າສະນາມ, ປ່າສະຫງວນພູຫີນໜາມໜໍ່ ທີ່ສວຍງາມເຊິ່ງກຽມຮັບ ຮອງເປັນມໍລະດົກໂລກທາງທຳມະຊາດ ແລະ ສະຖານທີ່ອື່ນໆ.
ນອກນັ້ນຍັງມີແຫລ່ງທ່ອງທ່ຽວທີ່ສຳຄັນທາງປະຫວັດສາດ ແລະ ວັດທະນະທຳຫລາຍແຫ່ງທີ່ເປັນມົນສະເໜ່ມັດໃຈຜູ້ຄົນທີ່ມາທົ່ວສາລະທິດ ໃນນີ້ມີພະທາດສີໂຄດຕະບອງ ເຊິ່ງເປັນປູ ຊະນີຍະສະຖານ ແລະ ເປັນສັນຍາລັກຂອງປະຊາຊົນຊາວແຂວງຄຳມ່ວນ, ມີພະທາດຕຸ້ມພະວັງ ຢູ່ບ້ານນາວາງ, ຫໍໄຫວ້ປະ ທານໂຮຈິມິນ ຢູ່ບ້ານຊຽງຫວາງ ເມືອງໜອງບົກ….
ທ່ານ ຄຳສີ ອຸດທິວົງ ຮອງເຈົ້າແຂວງໆຄຳມ່ວນ ກ່າວໃງານຖະແຫຼງຂ່າວກ່ຽວກັບການຈັດງານປີທ່ອງທ່ຽວລາວ 2018 ຂອງ ແຂວງຄຳມ່ວນວ່າ: ໂດຍລວມແລ້ວຈາກການສຳຫລວດແຫລ່ງທ່ອງທ່ຽວຢູ່ແຂວງ ຄຳມ່ວນ ປະຈຸບັນມີທັງໝົດ 198 ແຫ່ງ, ໃນນັ້ນມີແຫລ່ງທ່ອງທ່ຽວທາງທຳມະຊາດ 139 ແຫ່ງ, ທາງປະຫວັດສາດມີ 29 ແຫ່ງ ແລະ ທ່ອງທ່ຽວທາງວັດທະນະທຳມີ 30 ແຫ່ງ.
ພ້ອມນັ້ນຢູ່ແຂວງຄຳມ່ວນຍັງມີການທ່ອງທ່ຽວຢ້ຽມຊົມວິຖີຊີວິດຂອງປະຊາຊົນ ບັນດາເຜົ່າຢູ່ແຕ່ລະເມືອງນຳອີກ.
ດ້ານສິ່ງອຳນວຍຄວາມສະດວກເພື່ອຮອງຮັບນັກທ່ອງທ່ຽວປະກອບມີ: ໂຮງແຮມ 21 ແຫ່ງ, ເຮືອນພັກ 112 ແຫ່ງ, ມີບໍລິສັດນຳທ່ຽວ 5 ແຫ່ງ, ນອກນັ້ນຍັງມີຮ້ານອາຫານ, ຮ້ານກິນດື່ມ ແລະ ຮ້ານບັນເທີງຕ່າງໆໄວ້ ຄອຍບໍລິການນັກທ່ອງທ່ຽວຢ່າງຄົບຖ້ວນ.
ວຽກງານທ່ອງທ່ຽວໄດ້ສ້າງລາຍຮັບໃຫ້ກັບແຂວງຄຳມ່ວນເພີ່ມຂຶ້ນໃນແຕ່ລະປີ, ເຊັ່ນໃນປີ 2015 ມີນັກທ່ອງທ່ຽວເຂົ້າມາແຂວງຄຳມ່ວນ 519.451 ເທື່ອຄົນ, ມີລາຍຮັບສຳພັດ 320 ຕື້ກວ່າກີບ, ປີ 2016 ມີນັກທ່ອງທ່ຽວເພີ່ມຂຶ້ນເປັນ 538.027 ເທື່ອຄົນ ແລະ ມີລາຍຮັບສຳພັດ 345 ຕື້ກວ່າກີບ. ສຳລັບປີ 2017 ໃນ 11 ເດືອນ ມີຈຳນວນນັກທ່ອງທ່ຽວເຂົ້າມາແຂວງຄຳມ່ວນ 464.584 ເທື່ອຄົນ, ມີລາຍຮັບສຳພັດປະມານ 338ຕື້ກວ່າກີບ.
ໃນປີ2018 ນີ້ແຂວງຄຳມ່ວນຈະດຶງດູດນັກທ່ອງທ່ຽວເຂົ້າມາແຂວງຄຳມ່ວນໄດ້ຈຳນວນ 565.000 ຄົນ ແລະ ຈະມີລາຍຮັບສຳພັດເພີ່ມຂຶ້ນປະມານ 8-10% ຫລືປະມານ 370 ຕື້ກວ່າກີບ.
ສ່ວນກິດຈະກຳເພື່ອສົ່ງເສີມ ການທ່ອງທ່ຽວ ແລະ ດຶງດູດເອົານັກທ່ອງທ່ຽວເຂົ້າມາທ່ຽວຢູ່ແຂວງຄຳມ່ວນໃນໂອກາດເປີດປີທ່ອງທ່ຽວລາວ 2018 ແມ່ນ ປະກອບມີດັ່ງນີ້:
1.ກິດຈະກຳໃນໂອກາດ ພິທີເປີດປີທ່ອງທ່ຽວລາວ 2018 ທີ່ແຂວງຄຳມ່ວນ ແລະ ງານບຸນນະມັດສະການພະ ທາດສີໂຄດຕະບອງ ຈະເລີ່ມແຕ່ວັນທີ 25-31 ມັງກອນ 2018,
2.ກິດຈະ ກຳສະເຫລີມສະຫລອງປີທ່ອທ່ຽວລາວ 2018 ຂອງ 10 ຕົວເມືອງ ເຊັ່ນ: ບຸນນະມັດສະການພະທາດສີໂຄດຕະບອງ, ບຸນນະ ມັດສະການພະທາດເມືອງພອນ, ບຸນປີໃໝ່ລາວແຫ່ນາງສັງຂານ, ບຸນອອກພັນສາເມືອງທ່າແຂກ, ບຸນນະມັດສະການພະທາດ ຕຸ້ມພະວັງ, ບຸນສົມໂພດພະທາດວັດປ່າໂສກຄຳແສນ ເມືອງໜອງບົກ, ພິທີຫົດພະອັງແສນ ທີ່ບ້ານສັງ ເມືອງເຊບັ້ງໄຟ, ພະອົງ ແສນ ບ້ານໂພວາ ເມືອງມະຫາໄຊ, ພະອົງແສນບ້ານນາຄື ເມືອງຫີນບູນ, ບຸນຫລິ້ນຕົມ ແລະ ບຸນປີໃໝ່ລາວ ບ້ານກອງລໍ ເມືອງຄູນຄຳ ເຊື່ອມໃສ່ກັບການທ່ອງທ່ຽວຖໍ້າກອງລໍ-ນາຕານ, ບຸນຊ່ວງເຮືອບັນດາເມືອງຕ່າງໆເຊັ່ນ: ເມືອງນາກາຍ, ມະຫາໄຊ, ເຊບັ້ງໄຟ, ໜອງບົກ, ທ່າແຂກ, ຫີນບູນ ແລະ ຄູນຄຳ, ງານບຸນກິນເຕດ( ບຸນປີໃໝ່ຂອງພີ່ນ້ອງສັນຊາດລາວເຊື້ອຊາດ ຫວຽດ ນາມ ແລະ ຈີນ ).
ກິດຈະກຳປິ່ນອ້ອມພາຍໃນທີ່ຄາດວ່າຈະຕ້ອງຈັດຂຶ້ນເພີ່ມເຕີມມີ ລາຍການແຂ່ງຂັນໄຕຣກິລາ ເຊິ່ງແມ່ນ ກຸ່ມບໍລິສັດໄຟຟ້ານໍ້າເທີນ 2 ຈະຈັດຂຶ້ນທີ່ເມືອງນາກາຍ, ການຈັດ ແລະ ເຂົ້າຮ່ວມງານວາງສະແດງ ສິນຄ້າຜະລິດ ຕະພັນທ່ອງ ທ່ຽວໃນງານຕ່າງໆ,ກິດຈະກຳການທ່ອງທ່ຽວທີ່ເຊື່ອມສານກັບປະເທດໃກ້ຄຽງ ໂດຍສະເພາະກັບຈັງຫວັດນະຄອນພະນົມ ຣາຊະອານາຈັກໄທ, ເປັນຕົ້ນແມ່ນການຈັດຂະບວນຄາລະວານລົດຖີບ ເພື່ອສະເຫລີມສະຫລອງວັນເປີດນຳໃຊ້ຂົວມິດຕະ ພາບ ລາວ-ໄທ ແຫ່ງທີ 3 ຄຳມ່ວນ-ນະຄອນພະນົມ ໃນວັນທີ 11/11,
ການຈັດລາຍການຢ້ຽມຢາມແຫລ່ງທ່ອງທ່ຽວສຳລັບສື່ມວນຊົນ ແລະ ບໍລິສັດທ່ອງທ່ຽວພາຍໃນ ແລະ ຕ່າງປະເທດເພື່ອໂຄສະນາຜະລິດຕະພັນ ແລະ ແຫລ່ງທ່ອງທ່ຽວອັນໂດດ ເດັ່ນຂອງ ແຂວງຄຳມ່ວນ ເຊັ່ນ: ເສັ້ນທາງທ່ອງທ່ຽວເຊື່ອມຕໍ່ກັບແຂວງບໍລິຄຳໄຊ, ຄະນະຜູ້ແທນກອງປະຊຸມທ່ອງທ່ຽວ, ແຫລ່ງທ່ອງທ່ຽວ ແລະ ການສະແດງສິນລະປະວັນນະຄະດີໃນງານຕ່າງໆເພື່ອເປັນການໂຄສະນາສົ່ງເສີມການທ່ອງທ່ຽວ ແລະ ເຜີຍແຜ່ສິນລະປະ ວັດທະນະທຳຂອງລາວເຮົາໃຫ້ກວ້າງໄກ.
ຮຽບຮຽງຈາກ: https://www.khammouanenews.com
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
