ເມືອງສະໝ້ວຍ ເປີດປີທ່ອງທ່ຽວ ຕິດພັນກັບປະເພນີວັດທະນະທຳຊົນເຜົ່າ

ເມືອງສະໝ້ວຍ ແຂວງສາລະວັນ ໄດ້ຈັດງານສະເຫຼີມສະຫຼອງປີທ່ອງທ່ຽວລາວ 2018 ຕິດພັນກັບງານບຸນປະເພນີວັດທະນະທຳບັນດາເຜົ່າຂອງເມືອງ ເລີ້ມແຕ່ວັນທີ 27-28 ມີນາ 2018 ດ້ວຍບັນຍາກາດຄຶກຄື້ນມ່ວນຊື່ນ, ໃນພິທີເປີດງານ ມີຂະບວນສວນສະໝາມ 6 ກ້ອນກຳລັງຄື: ກ້ອນກຳລັງນາງສາວຖືປ້າຍຄຳຂວັນທ່ອງທ່ຽວເມືອງ, ກ້ອນກຳລັງກຸ່ມພະນັກງານ, ຄອບຄົວການນຳ ແລະມວນຊົນອ້ອມຂ້າງ, ກ້ອນກຳລັງຟ້ອນລຳອາເຢນ, ຟ້ອນລຳຈາເຈີບ, ຟ້ອນລຳຕາວ້າຍຂອງເຜົ່າກາໄນ, ຟ້ອນອາອູນ, ກ້ອນກຳລັງບົດຟ້ອນເຊີນທ່ຽວເມືອງສະໝ້ວຍ ແລະບົດຟ້ອນມ່ວນຊື່ນບຸນອະລຽວ(ງານບຸນວັດທະນະທຳຊົນເຜົ່າ).

 ທ່ານ ຄຳຕາ ໂຮ່ຊົງເລືອງ ເຈົ້າເມືອງໆສະໝ້ວຍ ໄດ້ໃຫ້ຮູ້ວ່າ: ການເປີດງານຄັ້ງນີ້ແມ່ນມີຄວາມໝາຍຄວາມສໍາຄັນ ໂດຍສະເພາະເພື່ອສົ່ງເສີມການທ່ອງທ່ຽວ ແນໃສ່ເສີມຂະຫຍາຍມູນເຊື້ອທາງດ້ານວັດທະນະທຳ, ຂະນົບທຳນຽມ ແລະອະນຸລັກຮັກສາວັດທະນະທຳທີ່ເປັນເອກະລັກ ແລະຮີດຄອງປະເພນີອັນດີງາມຂອງປະຊາຊົນບັນດາເຜົ່າເມືອງສະໝ້ວຍ. ທັງເປັນການປູກຈິດສຳນຶກ ແລະຍົກສູງຄວາມຮັບຮູ້ຂອງສັງຄົມກໍ່ຄືປະຊາຊົນເຫັນຄວາມສຳຄັນຂອງວຽກງານທ່ອງທ່ຽວ ຕິດພັນກັບການສົ່ງເສີມການຜະລິດກະສິກຳ, ຫັດຖະກຳເປັນສິນຄ້າ, ການລົງທຶນ, ການຄ້າ ແລະການບໍລິການໃຫ້ມີທ່າອ່ຽງຂະຫຍາຍຕົວ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງເມືອງ.

ສຳລັບວັດທະນະທຳຮີດຄອງປະເພນີຂອງປະຊາຊົນຊາວເມືອງສະໝ້ວຍ ໃນທຸກໆປີປະຊາຊົນ ແລະເຈົ້າກົກເຈົ້າເຫຼົ່າ ແມ່ນໄດ້ປຶກສາຫາລື ແລະກຳນົດເອົາມື້ສັນວັນດີ ເພື່ອຈັດງານບຸນເປັນຕົ້ນແມ່ນ: ບຸນອາຢາ ຊື່ງພາຍຫຼັງປະຊາຊົນເກັບກ່ຽວແລ້ວ ຈະໄດ້ຈັດບຸນຂຶ້ນເພື່ອສະແດງຄວາມຮູ້ບຸນຄຸນຕໍ່ຟ້າຝົນ, ຜີເຂົ້າ, ຜູ້ພູຜາປ່າໄມ້ ແລະອື່ນໆ,ບຸນອາປຽນ ຊື່ງເປັນບຸນຜັດເຂົ້າປູກກຽມລົງມືສັກເຂົ້າໄຮ່, ບຸນຈາແລ ເປັນບຸນທີ່ໄລຍະເຂົ້າໄຮ່ຖອກຮວງ ແລະຍັງມີບຸນແຮ່ເຂີຍ, ຂຶ້ນເຮືອນໃໝ່ ແລະບຸນອາລຽວປຶງ ປະກອບມີ 2 ປະເພດຄື: ບຸນອາລຽວອາລຽມ ເປັນບຸນຄົບຮອບ 5 ຫາ 10 ເພື່ອເອີ້ນຂວັນຜູ້ລ່ວງລັບໃນເວລາຂຶ້ນເຮືອນໃໝ່ ແລະບຸນອາລຽວລະປຶບໂກກ ເປັນບຸນເກັບດູກແຈກເຂົ້າ ທຸກໆ 10 ປີ, 20 ປີ ຫຼື 30 ປີ ຈະໄດ້ຈັດຂຶ້ນເທື່ອໜຶ່ງ ຫຼື ບຸນນີ້ຈະເກີດຂຶ້ນກໍ່ຕໍ່ເມື່ອຈົບເຊັ່ນຄົນໜຶ່ງເພື່ອທ້ອນໂຮມບັນດາອັດຖິ.

ໃນບຸນປະເພນີຕ່າງໆຂອງເຜົ່າບຸນປະໂກະ(ກາໂດ, ກາໄນ) ທີ່ມີການຂ້າຄວາຍ, ງົວ ແລະສະຖານທີ່ມີເສົາຕັ້ງບູຊາ ເປັນການແກ້ຮີດເພື່ອບໍ່ໃຫ້ເປັນບາບເປັນເວນຕໍ່ໃນ ທີ່ມະນຸດເຄີຍໃຊ້ເປັນພາຫະນະ ແລະອື່ນໆ. ພາຍໃນງານສະຫຼອງປີທ່ອງທ່ຽວລາວຂອງເມືອງສະໝ້ວຍ ຍັງໄດ້ມີການຈັດງານປະກວດອາຫານ, ປະກວດບົດຟ້ອນ, ບົດລຳທ້ອງຖີ່ນ ແລະມີການແຂ່ງຂັນເຮືອຊ່ວງ, ທັງໄດ້ມີການຈຳໜ່າຍສິນຄ້າຕ່າງໆຢ່າງຫຼວງຫຼາຍ.

ໃນພິທີໃຫ້ກຽດເຂົ້າຮ່ວມຂອງ ທ່ານ ບົວທອງ ຄຸນຍອດປັນຍາ ຮອງເຈົ້າແຂວງໆສາລະວັນ, ໂດຍການເປັນປະທານຂອງ ທ່ານ ຄຳຕາ ໂຮ່ຊົງເລືອງ ເຈົ້າເມືອງໆສະໝ້ວຍ, ມີບັນດາຄະນະປະຈຳພັກເມືອງ, ແຂກຖືກເຊີນຈາກພະແນການອອ້ມຂ້າງແຂວງ, ເມືອງໃນທົ່ວແຂວງ, ພ້ອມດ້ວຍມວນຊົນພາຍໃນເມືອງສະໝ້ວຍເຂົ້າຮ່ວມ.

ທີ່ມາຈາກແຂວງສາລະວັນ
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty

ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com

All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com