ຫຼັງຈາກທີ່ມີຂ່າວ ການສະເຫນີສ້າງຕັ້ງນະຄອນ ມາແຕ່ທ້າຍປີ2017 ໃນທີ່ສຸດຂັ້ນຕອນຕ່າງໆກໍສຳເລັດ ແລະ ໄດ້ມີດຳລັດປະກາດສ້າງຕັ້ງນະຄອນ-ຫຼວງພະບາງ, ນະຄອນໄກສອນພົມວິຫານ ແລະ ນະຄອນປາກເຊຢ່າງເປັນທາງການ ເມື່ອວັນທີ 11 ເມສາຜ່ານມາ.
1. ນະຄອນ-ຫຼວງພະບາງ ແຂວງຫຼວງພະບາງ
ໃນນີ້ນາຍົກໄດ້ອອກດຳລັດ ສະບັບເລກທີ 126/ນຍ, ລົງວັນທີ 11 ເມສາ 2018 ວ່າດ້ວຍການສ້າງ ຕັ້ງນະຄອນ-ຫຼວງພະບາງ ປ່ຽນແທນເມືອງຫຼວງພະບາງ, ເຊິ່ງເປັນອົງການປົກ ຄອງທ້ອງຖິ່ນຂັ້ນດຽວກັນກັບຂັ້ນເມືອງ, ຂຶ້ນກັບແຂວງຫຼວງພະບາງ; ມີເນື້ອທີ່ທັງໝົດ 761 ກິໂລຕາແມັດ, ປະກອບມີ 114 ບ້ານ ແລະ ມີພົນລະເມືອງທັງໝົດ 97.760 ຄົນ, ຍິງ 48.167 ຄົນ;
ມາໃນວັນທີ15 ເມສາ 2018 ກໍໄດ້ມີພິທີ ປະກາດເມືອງຫຼວງພະບາງເປັນນະຄອນ-ຫຼວງພະບາງຢ່າງເປັນທາງການໂດຍການເຂົ້າຮ່ວມຂອງທ່ານ ບຸນຍັງ ວໍລະຈິດ ປະທານປະເທດແຫ່ງສປປລາວ.
ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ກ່າວໃນພິທີປະກາດສ້າງຕັ້ງ ນະຄອນ-ຫຼວງພະບາງວ່າ: ທົ່ວນະຄອນມີພົນລະເມືອງທັງໝົດ 97.760 ຄົນ, ຍິງ 48.167 ຄົນ, ມີເນື້ອທີ່ທັງໝົດ 761ກິໂລຕາແມັດ, ຄວາມໜາແໜ້ນຂອງປະຊາກອນທົ່ວນະຄອນມີ 137 ຄົນ ຕໍ່ກິໂລຕາແມັດ. ສຳລັບເນື້ອທີ່ໃນຕົວ ນະຄອນ ມີ 80,55 ກິໂລຕາແມັດ ມີພົນລະເມືອງ 72.812 ຄົນ ຄວາມໜາແໜ້ນ ຂອງປະຊາກອນມີ 908 ຄົນ ຕໍ່ກິໂລຕາແມັດ, ມີຜູ້ປະກອບອາຊີບເປັນຊາວກະສິກອນຢູ່ພາຍໃນພື້ນທີ່ຕົວ ນະຄອນ 5%.
ບັນດາເສັ້ນທາງສາຍຫຼັກ, ເສັ້ນທາງຮ່ອມເປັນການປູຢາງກວມ 90%, ທຸກຄອບຄົວໄດ້ຊົມໃຊ້ ສາທາລະນູປະໂພກ 100%. ລວມຍອດຜະລິດຕະພັນໃນນະຄອນ ບັນລຸ 1.782,85 ຕື້ກີບ, ສະເລ່ຍລາຍຮັບໃສ່ພົນລະເມືອງໄດ້ 17.451.000 ກີບ ຫຼື ເທົ່າກັບ 2.401 ໂດລາ ຕໍ່ຄົນ/ປີ, ສາມາດກຸ້ມຕົນເອງດ້ານລາຍຈ່າຍບໍລິຫານ ກົງຈັກ ແລະ ມີສ່ວນແຮໄວ້, ທຸກບ້ານໃນຕົວນະຄອນໄດ້ຮັບຮອງເປັນບ້ານພັດທະນາ 100%.
2.ນະຄອນໄກສອນພົມວິຫານ ແຂວງສະຫວັນນະເຂດ
ດຳລັດສະບັບເລກທີ 127/ນຍ, ລົງວັນທີ 11 ເມສາ 2018 ວ່າດ້ວຍການສ້າງ ຕັ້ງນະຄອນ ໄກສອນພົມວິຫານ ປ່ຽນແທນເມືອງໄກສອນພົມວິຫານ, ເຊິ່ງເປັນອົງການປົກ ຄອງທ້ອງຖິ່ນຂັ້ນດຽວກັນກັບຂັ້ນເມືອງ, ຂຶ້ນກັບແຂວງສະຫວັນນະເຂດ; ມີເນື້ອທີ່ທັງໝົດ 776 ກິໂລຕາແມັດ, ປະກອບມີ 67 ບ້ານ ແລະ ມີພົນລະເມືອງທັງໝົດ 125.726 ຄົນ, ຍິງ 63.713 ຄົນ;
ທ່ານສັນຕິພາບ ພົມວິຫານເຈົ້າແຂວງໆສະຫວັນນະເຂດ ກ່າວເມື່ອມໍ່ໆນີ້ວ່າ: ປັດຈຸບັນເທດສະບານໄກສອນພົມວິຫານ ອາຊີບກະສິກອນມີພຽງ 20%, ມີເສັ້ນທາງປູຢາງ ແລະ ທາງເບຕົງກວມເຖິງ 98%, ຄອບຄົວໃຊ້ໄຟຟ້າ ແລະ ນ້ຳສະອາດ-ນໍ້າປະປາ ແມ່ນໄດ້ມາດຖານ 100% ແລ້ວ.ດ້ານງົບປະມານແມ່ນສາມາດປະຕິບັດໄດ້ກຸ້ມຕົນເອງ ແລະມີສ່ວນແຮໄວເພື່ອການລົງທຶນ; ດ້ານບ້ານພັດທະນາແມ່ນສາມາດປະຕິບັດໄດ້ 45 ບ້ານແລ້ວ ຈາກ 67 ທົ່ວເມືອງ.
ດຳລັດ ວ່າດ້ວຍ ການສ້າງຕັ້ງນະຄອນ ປາກເຊ ສະບັບເລກທີ 128/ນຍ ລົງວັນທີ 11 ເມສາ 2018. ມາດຕາ 1 ສ້າງຕັ້ງນະຄອນປາກເຊ ປ່ຽນແທນເມືອງປາກເຊ, ເຊິ່ງເປັນອົງການປົກຄອງທ້ອງຖິ່ນຂັ້ນດຽວກັນກັບເມືອງ, ຂຶ້ນກັບແຂວງຈຳປາສັກ; ມີເນື້ອທີ່ທັງໝົດ 125 ກິໂລຕາແມັດ, ປະກອບມີ 42 ບ້ານ ແລະ ມີພົນລະເມືອງທັງໝົດ 81.579 ຄົນ, ຍິງ 42.021 ຄົນ.
ທ່ານເຈົ້າເມືອງປາກເຊ ໃຫ້ຮູ້ວ່າ: ເມືອງປາກເຊ ມີ42 ບ້ານປະກາດເປັນບ້ານພັດທະນາແລ້ວ41(ສ່ວນອີກ1ບ້ານກຽມປະກາດໃນມໍ່ໆນີ້). ພົນລະເມືອງສ່ວນໃຫຍ່ປະກອບ ອາຊີບຄ້າຂາຍ, ບໍລິການ, ກຳມະກອນ, ນາຍຊ່າງຫັດຖະກຳ ກວມ 60%, ອາຊີບພະນັກງານກວມ 28% ແລະ ທຳການຜະລິດກະສິກອນກວມ 12%, ສະເລ່ຍຄວາມໜາແໜ້ນຂອງພົນລະເມືອງແມ່ນ 644 ຄົນ/ກິໂລຕາແມັດ.
ລວມຍອດ ລາຍຮັບຂອງປະຊາຊົນໄດ້ 1.346,793 ຕື້ກີບ ສະເລ່ຍ 2.065ໂດລາ/ຄົນ/ປີ; ເສດຖະກິດຂະຫຍາຍຕົວໃນ ລະດັບ 10,5% ໂຄງປະກອບເສດຖະກິດຂະແໜງກະສິກຳ ກວມ 10,5%/ປີ; ຂະແໜງອຸດສາຫະກຳ ກວມເອົາ 36,3%/ປີ, ຂະແໜງການບໍລິການກວມເອົາ 53,2%/ປີ.
ສຳລັບເງື່ອນໄຂການສ້າງຕັ້ງນະຄອນທີ່ກຳນົດໄວ້ໃນກົດໝາຍວ່າດ້ານການປົກຄອງທ້ອງຖິ່ນມາດຕາ 63 (ໃໝ່) ໄດ້ລະບຸ ໃນການສ້າງຕັ້ງນະຄອນ ຕ້ອງມີເງື່ອນໄຂຄົບຖ້ວນ ດັ່ງນີ້:
1. ເປັນເມືອງ ຫຼື ເທດສະບານ ທີ່ມີພົນລະເມືອງແຕ່ຫົກສິບພັນຄົນຂຶ້ນໄປ ແລະ ຢູ່ພາຍໃນພື້ນທີ່ຕົວ ເມືອງ ຫຼື ຕົວເທດສະບານຕ້ອງມີ ຊາວຫ້າພັນຄົນ ຂຶ້ນໄປ;
2. ມີຄວາມໜາແໜ້ນຂອງພົນລະເມືອງພາຍໃນພື້ນທີ່ຕົວເມືອງ ຫຼື ຕົວເທດສະບານ ຊຶ່ງເປັນທີ່ຕັ້ງຂອງອົງ ການປົກຄອງເມືອງ ຫຼື ເທດສະບານ ແຕ່ເກົ້າຮ້ອຍຄົນຂຶ້ນໄປຕໍ່ກິໂລຕາແມັດ;
3. ມີຈຳນວນຜູ້ປະກອບອາຊີບເປັນກະສິກອນຢູ່ພາຍໃນພື້ນທີ່ຕົວເມືອງ ຫຼື ຕົວເທດສະບານ ຊຶ່ງເປັນທີ່ຕັ້ງ ຂອງອົງການປົກຄອງເມືອງ, ເທດສະບານບໍ່ເກີນ ຊາວຫ້າສ່ວນຮ້ອຍ ຂອງຈຳນວນພົນລະເມືອງ ທັງໝົດ ທີ່ຢູ່ພາຍໃນພື້ນທີ່ຕົວເມອງ ຫຼື ຕົວເທດສະບານ ດັ່ງກ່າວ;
4. ມີພື້ນຖານໂຄງລ່າງດ້ານເສດຖະກິດ, ວັດທະນະທຳ-ສັງຄົມ ໄດ້ຮັບການພັດທະນາໃນລະດັບສູງ ແລະ ເປັນລະບົບຄົບຊຸດ;
5. ເປັນບ້ານພັດທະນາທັງໝົດ;
6. ກຸ້ມຕົນເອງດ້ານລາຍຈ່າຍບໍລິຫານປົກກະຕິ ແລະ ມີສ່ວນແຮໄວ້ເພື່ອການລົງທຶນ.
ແຫຼ່ງທີ່ມາຈາກ: ຫນັງສືພິມເສດຖະກິດ ການຄ້າ
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
