ນັບແຕ່ນາຍົກລັດຖະມົນຕີ ອອກດຳລັດສ້າງຕັ້ງນະຄອນ-ຫຼວງພະບາງ, ນະຄອນໄກສອນພົມວິຫານ ແລະນະຄອນປາເຊ ເມື່ອວັນທີ11 ເມສາ 2018 ກໍເກີດມີຄຳຖາມຫຼາຍຢ່າງຂຶ້ນມາວ່າ ນະຄອນມີຂອບເຂດສິດຫນ້າທີ່ສຳໃດ.
ອີງຕາມດຳລັດ ເລກທີ 125/ນຍ ລົງວັນທີ 11 ເມສາ 2018 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງນະຄອນໄດ້ລະບຸໃນມາດຕາ 2 ວ່າ: ອົງການປົກຄອງນະຄອນ ແມ່ນ ອົງການບໍລິຫານລັດຂັ້ນດຽວກັບຂັ້ນເມືອງ ຂຶ້ນໂດຍກົງກັບແຂວງ ເຊິ່ງມີພາລະບົດບາດຄຸ້ມຄອງບໍລິຫານທາງດ້ານການເມືອງ, ການປົກຄອງ, ເສດຖະກິດ, ວັດທະນະທຳ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ; ສ້າງ ແລະ ນຳໃຊ້ຊັບພະຍາກອນມະນຸດ, ປົກປັກຮັກສາ ແລະ ນຳໃຊ້ຊັບພະຍາກອນທຳມະຊາດ, ສິ່ງແວດລ້ອມ ແລະ ຊັບພະຍາກອນອື່ນໃຫ້ເກີດປະໂຫຍດສູງສຸດ; ຊີ້ນຳ, ກວດກາການຈັດຕັ້ງປະຕິບັດແຜ່ນພັດທະນາບ້ານ, ຈັດຕັ້ງບໍລິການສາທາລະນະ, ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມສະອາດ ແລະ ສວຍງາມໃນນະຄອນດ້ວຍພາຫະນະເຕັກນິກ ແລະ ວິທີກ້າວໜ້າທັນສະໄໝ ເພື່ອພັດທະນານະຄອນຕາມທິດຍືນຍົງ, ສີຂຽວ ແລະ ເຂັ້ມແຂງ ຮອບດ້ານ.
ສ່ວນສິດ ແລະ ຫນ້າທີ່ອົງການປົກຄອງນະຄອນ ໄດ້ລະບຸໄວ້ໃນມາດຕາ3 ດັ່ງນີ້
1. ຮັບປະກັນການຈັດຕັ້ງປະຕິບັດ ລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຂອງອົງການຈັດຕັ້ງລັດຂັ້ນເທິງ;
2. ສ້າງ ແລະ ພັດທະນານະຄອນ ໃຫ້ມີຄວາມກ້າວໜ້າ, ສີວິໄລ ແລະ ທັນສະໄໝ;
3. ຕິດຕາມ, ຊຸກຍູ້, ປຸກລະດົມ ວຽກງານເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ;
4. ສ້າງ ແລະ ຈັດຕັ້ງປະຕິບັດແຜ່ນພັດທະນາເສດຖະກິດ-ສັງຄົມ, ແຜນງົບປະມານ, ວຽກງານປ້ອງກັນຊາດ-ປ້ອງກັນຄວາມສະຫງົບ; ຕ້ານ ແລະ ສະກັດກັ້ນການສໍ້ຫຼາດບັງຫຼວງ ແລະ ປະກົດການຫຍໍ້ທໍ້ໃນສັງຄົມ;
5. ຈັດຕັ້ງ, ອຳນວຍ, ຄວບຄຸ້ມ ແລະຕິດຕາມກວດກາການເຄື່ອນໄຫວການປະຕິບັດໜ້າທີ່ຂອງກົງຈັກຊ່ວຍວຽກຂອງ ນະຄອນ ແລະ ຂອງອົງການປົກຄອງບ້ານ;
6. ສ້າງຕັ້ງ ແລະ ຄຸ້ມຄອງໜ່ວຍງານບໍລິການລັດ, ຈັດຕັ້ງຄຸ້ມຄອງບໍລິຫານນະຄອນ ໃຫ້ມີການພັດທະນາພື້ນຖານໂຄງລ່າງ, ການບໍລິການສາທາລະນະທີ່ຈຳເປັນ, ມີຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມສະອາດ ແລະ ສວຍງາມ;
7. ໂຄສະນາ, ເຜີຍແຜ່ ແລະ ໃຫ້ຄວາມຮູ້ກ່ຽວກັບວຽກງານສຸຂະອານາໄມແກ່ປະຊາຊົນ, ສົ່ງເສີມດ້ານສາທາລະນະສຸກ, ພັດທະນາການສຶກສາ, ກິລາ-ກາຍະກຳ ແລະ ສິດສະເໝີພາບລະຫວ່າງຍິງ-ຊາຍ;
8. ປົກປັກຮັກສາ, ສົ່ງເສີມວັດທະນະທຳ, ຮີດຄອງປະເພນີອັນດີງາມຂອງປະເທດຊາດ, ທ້ອງຖິ່ນ ແລະ ຂອງເຜົ່າ; ສົ່ງເສີມການພັດທະນາສີມືແຮງງານ ແລະ ຄຸ້ມຄອງແຮງງານຕາມພາລະບົດບາດ ແລະ ຕາມການແບ່ງຂັ້ນຄຸ້ມຄອງ;
9. ອຳນວຍຄວາມສະດວກ ແລະ ຕິດຕາມການຈັດຕັ້ງປະຕິບັດໂຄງການລົງທຶນທີ່ສູນກາງ ແລະ ແຂວງຄຸ້ມຄອງ; ສົ່ງເສີມການລົງທຶນຂອງເອກກະຊົນພາຍໃນ ແລະ ຕ່າງປະເທດຕາມການແບ່ງຂັ້ນຄຸ້ມຄອງ;
10. ເສີມຂະຫຍາຍຄວາມສາມັກຄີປອງດອງ ຂອງປະຊາຊົນລາວບັນດາເຜົ່າ ແລະ ທຸກຊັ້ນຄົນໃນສັງຄົມ, ຄຸ້ມຄອງພົນລະເມືອງ, ຄົນຕ່າງດ້າວ, ຄົນຕ່າງປະເທດ, ຄົນບໍ່ມີສັນຊາດ, ວຽກງານເຜົ່າ ແລະ ສາສະໜາ, ປັບປຸງຊີວິດການເປັນຢູ່ ແລະ ແກ້ໄຂຄວາມທຸກຢາກຂອງປະຊາຊົນ;
11. ພິຈາລະນາ, ໃຫ້ຄຳແນະນຳ ແລະ ແກ້ໄຂຂໍ້ສະເໜີ ຂອງການຈັດຕັ້ງ ຫຼື ບຸກຄົນ ທີ່ກ່ຽວພັນກັບການກະທຳ ຂອງພະນັກງານ-ລັດຖະກອນ ແລະ ອົງການບໍລິຫານລັດໃນທ້ອງຖິ່ນຂອງຕົນ;
12. ຄຸ້ມຄອງ, ປົກປັກຮັກສາ, ນຳໃຊ້ ແລະ ພັດທະນາຊັບພະຍາກອນທຳມະຊາດ, ສິ່ງແວດລ້ອມ ຕາມການແບ່ງຂັ້ນຄຸ້ມຄອງ ເພື່ອສ້າງແຫຼ່ງລາຍຮັບ, ຈັດເກັບລາຍຮັບໃຫ້ຖືກຕ້ອງ; ຄຸ້ມຄອງຫົວໜ່ວຍທຸລະກິດ, ອຸດສະຫະກຳ, ການຄ້າ, ການບໍລິການ ແລະ ອື່ນໆ.
14. ອອກຂໍ້ຕົກລົງ, ຄໍາສັ່ງ, ຄໍາແນະນໍາ, ແຈ້ງການ; ສັ່ງໂຈະ ຫຼື ຍົກເລີກນິຕິກໍາອື່ນ ຂອງທຸກຫ້ອງການ, ອົງການລັດທຽບເທົ່າຫ້ອງການຂອງນະຄອນ ແລະ ຂັ້ນລຸ່ມ ທີ່ຂັດກັບກົດໝາຍ ຍົກເວັ້ນຄຳຕົກລົງກ່ຽວກັບການດຳເນີນຄະດີຂອງອົງການໄອຍະການປະຊາຊົນ ແລະ ສານປະຊາຊົນທ້ອງຖິ່ນ; ສະເໜີຂັ້ນເທິງ ພິຈາລະນາໂຈະ ຫຼື ຍົກເລີກນິຕິກຳ ຂອງຂະແໜງການທີ່ຂັດກັບກົດໝາຍ.
15. ຄົ້ນຄວ້າໂຄງປະກອບການຈັດຕັ້ງ ແລະ ການກຳນົດເຂດແດນຂອງນະຄອນ; ການສ້າງຕັ້ງ, ຍຸບເລີກ, ໂຮມເຂົ້າ, ແຍກອອກ, ກຳນົດເຂດແດນຂອງບ້ານ ແລະ ການປ່ຽນຊື່ບ້ານ.
16. ຊຸກຍູ້, ສົ່ງເສີມ ແລະ ສ້າງເງື່ອນໄຂໃຫ້ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ທຸກພາກສ່ວນເສດຖະກິດ ແລະ ປະຊາຊົນລາວບັນດາເຜົ່າ ເຂົ້າຮ່ວມການພັດທະນາເສດຖະກິດ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ ແລະ ຕ້ານປາກົດການຫຍໍ້ທໍ້ ໃນນະຄອນຂອງຕົນ.
17. ສ້າງຜັງເມືອງ, ຄຸ້ມຄອງການກໍ່ສ້າງ ແລະ ການພັດທະນາໃນພື້ນທີ່ນະຄອນ, ປັບປຸງບູລະນະໂຄງລ່າງ, ຄຸ້ມຄອງວັດທະນະທຳ-ສັງຄົມ, ກິລາ-ກາຍະກຳ ແລະ ການບໍລິການຂອງນະຄອນ ເຊິ່ງມີຖະໜົນ, ໄຟຟ້າ, ນໍ້າປະປາ, ຮ່ອງລະບາຍນໍ້າ, ລະບົບບຳບັດນໍ້າເປື້ອນ, ປ້ອງກັນຕາຝັ່ງເຈື່ອນ, ໂຮງຮຽນ, ໂຮງໝໍ, ຕະຫຼາດ, ຮ້ານກິນດື່ມ, ສະຖານບັນເທີງ, ລະບົບແສງສະຫວ່າງ, ສວນສາທາລະນະ, ປ້ອງກັນ ແລະ ແກ້ໄຂ ສາທາລະນະໄພ, ອະນາໄມ, ເກັບມ້ຽນ, ກໍາຈັດຂີ້ເຫຍື້ອ ແລະ ອື່ນໆ.
18. ສ້າງຕັ້ງ ແລະ ຄຸ້ມຄອງການບໍລິການສາທາລະນະທີ່ຈໍາເປັນ ເປັນຕົ້ນ ການຂົນສົ່ງມວນຊົນ, ວິສາວະກໍາການຈະລາຈອນໃນທ້ອງຖະໜົນ, ການຄຸ້ມຄອງຈັດສັນຄິວລົດ, ບ່ອນຈອດລົດໃນສະຖານທີ່ສາທາລະນະ ແລະ ອື່ນໆ.
19. ຄຸ້ມຄອງ, ກວດກາກິດຈະການກໍ່ສ້າງ ໃຫ້ໄດ້ມາດຕະຖານ, ມີຄວາມປອດໄພ ແລະ ທົນທານ.
20. ປົກປັກຮັກສາ ແລະ ປັບປຸງສິ່ງແວດລ້ອມເປັນຕົ້ນ ເຂດສະຫງວນ, ໜອງ, ບຶງ, ເຂດແຄມແມ່ນໍ້າ, ທິວທັດທໍາມະຊາດ, ປ່າສະຫງວນ ແລະ ອື່ນໆ.
21. ຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພໃນຊີວິດ ແລະ ຊັບສິນຂອງປະຊາຊົນ, ອະນຸລັກ ແລະ ຄຸ້ມຄອງອາຄານ, ສະຖານທີ່ທີ່ມີລັກສະນະທາງສິລະປະ, ວັດທະນະທຳ, ສະຖາປັດຕະຍະກຳຂອງຊາດ, ຂອງທ້ອງຖິ່ນ ທີ່ມີລັກສະນະທາງດ້ານປະຫວັດສາດ.
22. ຄຸ້ມຄອງການຈັດຕັ້ງ, ພະນັກງານ-ລັດຖະກອນ; ຕິດຕາມກວດກາການປະຕິບັດໜ້າທີ່ຂອງພະນັກງານ-ລັດຖະກອນຂອງຫ້ອງການສາຍຕັ້ງຂັ້ນແຂວງ ແລະ ອົງການທີ່ກ່ຽວຂ້ອງ.
23. ສ້າງ, ບໍາລຸງ ຍົກລະດັບຄວາມຮູ້, ຄວາມສາມາດທາງດ້ານການເມືອງ, ການປົກຄອງ, ວິຊາສະເພາະໃຫ້ພະນັກງານ-ລັດຖະກອນຂອງຕົນ ແລະ ພະນັກງານຂອງບ້ານ.
24. ລາຍງານສະພາບການຈັດຕັ້ງປະຕິບັດວຽກງານຂອງຕົນ ລວມທັງສະພາບການເຄື່ອນໄຫວວຽກງານຮອບດ້ານຂອງນະຄອນ ໃຫ້ເຈົ້າແຂວງ ແລະ ອົງການທີ່ກ່ຽວຂ້ອງຢ່າງເປັນປົກກະຕິ.
25. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ.
ຮູບຈາກ: noy images, anouphon phomhacsar
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
