ເມື່ອວັນທີ15 ເມສາຜ່ານມາ ໄດ້ມີພິທີປະກາດເມືອງຫຼວງພະບາງເປັນນະຄອນ-ຫຼວງພະບາງ ຢ່າງເປັນທາງການພາຍຫຼັງທີ່ນາຍົກລັດຖະມົນຕີອອກດຳລັດສະບັບເລກທີ 126/ນຍ, ລົງວັນທີ 11 ເມສາ 2018 ວ່າດ້ວຍການສ້າງ ຕັ້ງນະຄອນ-ຫຼວງພະບາງ ປ່ຽນແທນເມືອງຫຼວງພະບາງ, ເຊິ່ງເປັນອົງການປົກ ຄອງທ້ອງຖິ່ນຂັ້ນດຽວກັນກັບຂັ້ນເມືອງ, ຂຶ້ນກັບແຂວງຫຼວງພະບາງ; ມີເນື້ອທີ່ທັງໝົດ 761 ກິໂລຕາແມັດ, ປະກອບມີ 114 ບ້ານ ແລະ ມີພົນລະເມືອງທັງໝົດ 97.760 ຄົນ, ຍິງ 48.167 ຄົນ.
ໃນພິທີ ທ່ານ ຄໍາມູນ ວິພົງໄຊ ຮອງລັດຖະມົນຕີ ກະຊວງພາຍໃນ ຜ່ານຂໍ້ຕົກລົງວ່າດ້ວຍການສ້າງຕັ້ງຫຼວງພະບາງເປັນນະຄອນ.
ຈາກນັ້ນທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງຂຶ້ນຜ່ານບົດກະກຽມການສ້າງນະຄອນວ່າ: ທົ່ວນະຄອນມີພົນລະເມືອງທັງໝົດ 97.760 ຄົນ ຍິງ 48.167 ຄົນ, ມີເນື້ອທີ່ທັງໝົດ 761 ກິໂລຕາແມັດ, ຄວາມໜາແໜ້ນຂອງປະຊາກອນທົ່ວນະຄອນມີ 137 ຄົນ ຕໍ່ກິໂລຕາແມັດ. ສຳລັບເນື້ອໃນຕົວ ນະຄອນ ມີ 80,55 ກິໂລຕາແມັດ, ມີພົນລະເມືອງ 72.812 ຄົນ ຄວາມໜາແໜ້ນ ຂອງປະຊາກອນມີ 908 ຄົນ ຕໍ່ກິໂລຕາແມັດ, ມີຜູ້ປະກອບອາຊີບເປັນຊາວກະສິກອນຢູ່ພາຍໃນພື້ນທີ່ຕົວນະຄອນ 5% ພື້ນຖານໂຄງລ່າງເສດຖະກິດ, ວັດທະນະທຳ-ສັງຄົມ ໄດ້ຮັບການພັດທະນາໃນລະດັບສູງ.
ບັນດາເສັ້ນທາງສາຍຫຼັກ, ເສັ້ນທາງຊອຍເປັນການປູຢາງກວມ 90%, ທຸກຄອບຄົວໄດ້ຊົມໃຊ້ ສາທາລະນູປະໂພກ 100%, ສິ່ງແວດລ້ອມໄດ້ຮັບການປົກປັກຮັກສາກາຍເປັນຕົວເມືອງສີຂຽວ. ລວມຍອດຜະລິດຕະພັນໃນນະຄອນ ບັນລຸ 1.782,85 ຕື້ກີບ, ສະເລ່ຍລາຍຮັບໃສ່ພົນລະເມືອງໄດ້ 17.451.000 ກີບ ຫຼື ເທົ່າກັບ 2.401 ໂດລາ ຕໍ່ຄົນ/ປີ, ສາມາດກຸ້ມຕົນເອງດ້ານລາຍຈ່າຍບໍລິຫານ ກົງຈັກ ແລະ ມີສ່ວນແຮໄວ້, ທຸກບ້ານໃນຕົວນະຄອນໄດ້ຮັບຮອງເປັນບ້ານພັດທະນາ 100%, ການບໍລິການຂົນສົ່ງທາງບົກ, ທາງນ້ຳ, ທາງອາກາດ ມີຄວາມສະດວກສະບາຍ ສາມາດເຊື່ອມຈອດກັບບັນດາແຂວງທັງພາຍໃນປະເທດ ແລະ ເຊື່ອມຈອດກັບບັນດາປະເທດໃກ້ຄຽງ ແລະ ອະນຸພາກພື້ນ.
ສຳລັບເງື່ອນໄຂການສ້າງຕັ້ງນະຄອນທີ່ກຳນົດໄວ້ໃນກົດໝາຍວ່າດ້ານການປົກຄອງທ້ອງຖິ່ນມາດຕາ 63 (ໃໝ່) ໄດ້ລະບຸ ໃນການສ້າງຕັ້ງນະຄອນ ຕ້ອງມີເງື່ອນໄຂຄົບຖ້ວນ ດັ່ງນີ້:
1. ເປັນເມືອງ ຫຼື ເທດສະບານ ທີ່ມີພົນລະເມືອງແຕ່ຫົກສິບພັນຄົນຂຶ້ນໄປ ແລະ ຢູ່ພາຍໃນພື້ນທີ່ຕົວ ເມືອງ ຫຼື ຕົວເທດສະບານຕ້ອງມີ ຊາວຫ້າພັນຄົນ ຂຶ້ນໄປ;
2. ມີຄວາມໜາແໜ້ນຂອງພົນລະເມືອງພາຍໃນພື້ນທີ່ຕົວເມືອງ ຫຼື ຕົວເທດສະບານ ຊຶ່ງເປັນທີ່ຕັ້ງຂອງອົງ ການປົກຄອງເມືອງ ຫຼື ເທດສະບານ ແຕ່ເກົ້າຮ້ອຍຄົນຂຶ້ນໄປຕໍ່ກິໂລຕາແມັດ;
3. ມີຈຳນວນຜູ້ປະກອບອາຊີບເປັນກະສິກອນຢູ່ພາຍໃນພື້ນທີ່ຕົວເມືອງ ຫຼື ຕົວເທດສະບານ ຊຶ່ງເປັນທີ່ຕັ້ງ ຂອງອົງການປົກຄອງເມືອງ, ເທດສະບານບໍ່ເກີນ ຊາວຫ້າສ່ວນຮ້ອຍ ຂອງຈຳນວນພົນລະເມືອງ ທັງໝົດ ທີ່ຢູ່ພາຍໃນພື້ນທີ່ຕົວເມອງ ຫຼື ຕົວເທດສະບານ ດັ່ງກ່າວ;
4. ມີພື້ນຖານໂຄງລ່າງດ້ານເສດຖະກິດ, ວັດທະນະທຳ-ສັງຄົມ ໄດ້ຮັບການພັດທະນາໃນລະດັບສູງ ແລະ ເປັນລະບົບຄົບຊຸດ;
5. ເປັນບ້ານພັດທະນາທັງໝົດ;
6. ກຸ້ມຕົນເອງດ້ານລາຍຈ່າຍບໍລິຫານປົກກະຕິ ແລະ ມີສ່ວນແຮໄວ້ເພື່ອການລົງທຶນ.
---------------------
ປະເທດລາວ: ຄວາມງາມທີ່ສຳຜັດໄດ້
LAOS: Touchable Beauty
ທຸກຮູບພາບແມ່ນລິຂະສິດ ຂອງນັກຖ່າຍຮູບ, ຫາກທ່ານຕ້ອງການນຳໃຊ້ຮູບພາບໃນເວັບໄຊ www.laopostcard.com ຫຼື ເພຈ www.facebook.com/LaoPostcard ກະລຸນາພົວພັນ ຂໍອານຸຍາດ ນຳເຈົ້າຂອງພາບ ຫຼື ຕິດຕໍ່ laopostcard@gmail.com
All photos are copyright! if you wish to use photos whether from www.laopostcard.com or www.facebook.com/LaoPostcard kindly contact photographers directly or you can email laopostcard@gmail.com
